Liverpool leh Real Madrid an tlawm

Season thar atana club hrang hrangte inbuatsaihnaa inkhelah Liverpool chu Bayern Munich lakah an tlawm a. Bacelona laka an tlawm hnu lawkah Real Madrid pawh Juventus hneh lovin an tlawm zui leh bawk.
Liverpool leh Bayern Munich te hi nilai zan khan Singapore National Stadium, Singapore-ah an inhmachhawn a, goal sarih zet luhna inkhelah 4-3 in German champion Bayern Munich an chak. Inkhel hmuhnawm takah hian si hnih an phurh hmasak zet hnuin Bayern in a tawp an khar tha a, hun tawp dawn hnaiha goal hnih an thun hmangin EPL club lian an lehthal.
German champion Bayern Munich lakah Liverpool in bul an tan tha viau a, inkhel tan atanga minute hnihna lekah Cody Gakpo chuan hmahruaina goal a thun nghal der. Hma takah goal an thun hian Jurgen Klopp-a team te a fuih phur zui viau a, tha takin an inlan zui. Jordan Henderson hmunruak luaha Reds captain ban hren hrengtu Virgil van Dijk chuan minute 28-naah an goal hnihna a thun. Darkar chanve hmaa goal hnih an thun hman vangin Reds hian Bayern hi an sawp a rinawm hman hial.
Si hnih an phurh hnuin Bayern an khel tha thar tehtlat a, minute kaw chhung lekin goal hnih an thun hman. Minute 33-naah Serge Gnabry chuan goal thunin an si phurh a sut then a. Minute 42-naah Leroy Sané chuan goal thunin an si phurh a sut zo va, 2-2 a inhnehtawk chungin chawlhlawk an hmang.
Chawlhlawk hnu lamah pawh Liverpool in bul an tan tha nawn leh a, goal an thun hmasa leh. Minute 66-naah Luis Díaz chuan hma an hruai nawn lehna goal a thun. Luis Diaz-a’n Reds goal thumna a thun hnu hian goal dang a luh belh mai thei lova, hun tawp lamah Bayern an che fuh zawn leh tlat thung. Minute 80-naah Josip Stanisic chuan goal thunin an si phurh a sut zo. 3-3 in an hnehtawk mai a rinawm hman a, hun pek belh minute 90+1-ah Frans Krätzig chuan Bayern hmahruai letna goal a thun leh ta mai a. Liverpool lakah hma an hruai vawi khatna hi an chakpui zui ta hial a ni.
Juventus 3-1 Real Madrid
Italian Serie A club lian Juventus leh Spain club ropui Real Madrid te chu Camping World Stadium, USA-ah an inhmachhawn a, Juventus in 3-1 in hnehna an chang.
Serie A club lian, hrem vanga European competition hmachhawn thei lo tur Juventus hian club ropui leh hausa Real Madrid lakah bul an tan tha viau a, minute khatnaah lekah Moise Kean chuan hmahruaina goal a thun nghal. Hma taka goal an thun hnuin Juventus hian goal an thun belh zui leh a, minute 20-naah Timothy Weah chuan an goal hnihna a thun. Si hnih an phurh hnuin Real Madrid in goal thun tumin tan an khawh a, minute 38-naah Vinícius Júnior chuan minute 38-naah goal thunin an si phurh a sut then.
Chawlhlawk hnu lamah goal thun tumin an innawr tawn viau a, inkhel hmuhnawm an lantir. Hun rei tak chhung goal thun thei an awm loh hnuin hun pek belh minute nganaah Dusan Vlahovic chuan Juventus goal thumna thunin an chakna a nem nghet a. Champions League-a team hlawhtling ber Real Madrid lakah Serie A club lian hian 3-1 in hnehna an chang zui ta a ni.
USA-a an inbuatsaihnaah Manchester United hnehin bul tan mah se Real Madrid hian a tawp an khar tha lo. An hmelma lian ber FC Barcelona lakah an tlawm a. Barcelona an ngam loh hnuin Juventus lakah an tlawm zui leh bawk.
Nilai zana inkhel dangah Chelsea leh Atletico Madrid te 1-1 in an inhnehtawk. La Liga club lian Atletico Madrid tan hian minute 80-naah Marius Wolf-a’n hmahruaina goal a thun a. Hun tawp dawn hnaiha an si phurh hi minute 89-naah Mason Burstow chuan Chelsea tan goal thunin an si phurh a sut a, Spanish club lakah tlawm an pumpelh hram.
Chelsea in tlawm an pumpelh hram lai hian EPL club Nottingham Forrest chu Stade Rennais lakah si nga fai ngawtin an tlawm ve thung.