Liverpool nena sawizawm mek Amorim

Liverpool nena sawizawm mek Amorim
Season kal lai tawp huna Liverpool chhuahsan tum ve tawh German coach Jurgen Klopp-a hmunruak luah tura sawirik rin zinga mi Sporting CP manager Ruben Amorim chuan Thawhtanni khan a hma lam hun chungchanga sawi neuh neuh awm tireh turin a dinna a sawichiang a, tun season kal mekah hian Portuguese giants tana trophy tam thei ang ber sualchhuah chu a ngaihtuah lian ber a nih thu a sawi.
Kum 39 mi lek ni chunga coach ngaihsan hlawh ni chho mek Portuguese hi Premier League hmahruaitu Reds meuh pawhin an ngaihven tih tlang hriat a ni a; Germany ram lama Bayer Leverkusen chetthatpui mektu Spanish coach Xabi Alonso chuan a club hlui lama manager post ruak tur a beisei loh thu karliamta maia a tihchian hnu phei chuan Amorim-a hma hun hian ngaihven a hlawh zual.
He boruakah hian Amorim pawhin a dinna a sawichhuak ve leh ta a, Sporting manager a nih thu leh chu bak nihna a neih loh thu a auchhuahpui a, a Primeira Liga club vawn mek tana trophy awm thei zawng zawng hui zawh vek bak ngaihtuah dang a neih rih loh thu sawi chungin, “Kan player-te hian chak an duhna sanzia an hrechiang tawk a, kei pawhin Sporting tana title tam thei ang ber lakpui ka duh. He hmuna mi zawng zawng hi title tam tak sualchhuak turin kan insawrbing mek a ni,” a ti.
Amorim hian amah thlaktu tur atana Sporting lamin Bayern Munich leh Portugal national team tana assistant coach hna thawk kawp mek, kum 37 mi Englishman Anthony Barry an ngaihven mek tih thuthang pawh fiamthu hmanga tarlang telin, “Min tibuaitu ber chu club lamin ka aiawhtu tur an thlang fel tawh tih hi a ni. Chu chu min tilungngaitu ber a ni mek a, vawiin hian Viana (Sporting director of football Hugo Viana) pawh hahdam turin ka hrilh tawh a, chutiang chu a thleng lo ang tih ka hrilh,” a ti.
Kum li a enkawl tawh chhungin Amorim-a hnuaiah Sporting game a dak zaih a, a hnuaia Portuguese club ‘attacking style’ chuan mi a hip ngawih ngawih a, heti kum chhung mai hian a club vawn mek chu Portuguese league title pakhat leh league cup pahnih a lakpui tling der tawh.
Amorim hi ‘Special One’ inti Portuguese coach zinga lar ber tih ngam Jose Mourinho tawngkam behchhanin ‘Special Two’ tia sawi a ni ve a; Italian Serie A club AS Roma boss ni mek leh a chipui ni bawk Mourinho nena khaikhin a nih chungchang sawichhuakin, “Thu awmze nei lo a ni. Ngaihtuah pawh ka ngaihtuah chhunzawm lo. The great Jose Mourinho leh Sporting manager chu khaikhin chi pawh va ni suh,” tiin inngaitlawmtak chungin coach ropui Mourinho nena tehkhin chi a nih loh thu a sawi.
Tun season kal laiah pawh Sporting chu Primera standing-ah hma a hruaipui leh mek a, game khata khel tlem zawk chungin an hmelma lian Benfica lakah point khatin an sang a, Portuguese top flight chuan title race-ah a vawrtawp a thleng chho mek a ni.
Nizan result tarlan hman lohah Portuguese club lian pahnih inel na tak hi Taca de Portugal semi-final second leg khelin Estadio da Luz-ah an intawng a, February ni 29 first leg-ah khan Sporting hi 2-1-in an lo chak tawh a ni.
Kartawp Inrinni hian league lamah team pahnih hi ‘Derby de Lisboa’ khelin an intawng zui leh dawn a, he game hi title hriltu ni thei ruak tawh tura ngaih a ni nghe nghe.