Lok Sabha inthlanpui atan Sector Officer-te training

April ni 19, 2024-a Lok Sabha Inthlanpui neih tur atana inpuahchahna kal zelah nimin khan Khawzawl DC Meeting Hall-ah Sector Officer leh Sector Police Officer te tan training buatsaih a ni.
Khawzawl District Administration enkawlna hnuaiah hian Assembly Segment pakhat – 22 Tuichang AS a awm a. Tuichang AS huamchhunga Polling Station 28 te hi Sector Officer leh Sector Police Officer 5 ve ve ten chan insemin an enkawl dawn a ni.
Training-ah hian State Level Master Trainer V. Lalmuanpuii, Project Director, DRDO Khawzawl chuan Sector Officer leh Sector Police Officer kalkhawmte chu inthlan kaihhnawiha an hriat tur thil hrang hrangte a hrilhfiah a. Heng zingah hian Inthlanni (Poll Day) a form hrang hrang chinfel dan tur te leh Inthlannaa mawhphurhna nei ten vote an thlakna tur ‘Election Duty Certificate’ chungchang te chu a langsar zual a ni. District Level Master Trainer Pu Elijah LH Sanga, SDC; Dr. Lalliantluanga leh Pi PC Lalhmingtluangi, Asst Professor, Govt. Khawzawl College te pawn kalkhawmte hi thupui hrang hrangah zirtirna an pe a. Electronic Voting Machine hnathawh dan en ho a ni a, khawih chhinna (hands-on training) neih a ni bawk.