Lok Sabha MP atan mi paruk Politician ni lo din loh tum

Lok Sabha inthlan lo awm turah Mizoramah candidate paruk an awm dawn tih a chiang ta; March ni 30 tlai dar 3 thleng khan a duh tan a inhnuhdawh theih a, hming pelut mi parukte zingah inhnukdawk an awm lo.Mi parukte nomination paper hi general observer Dr Nipun Vinayak leh a thawhpuite’n an lo endik tawh a, hnawl an awm lo. Chumi hnuah inhnuhdawh theihna hun hawn a ni a, inhnukdawk an awm lo a ni.
Lok Sabha inthlan lo awm turah hian Mizoram (ST) MP nih tumin mi paruk- Lalbiakzama (Congress), Richard Vanlalhmangaiha (ZPM), Vanlalhmuaka (BJP), K Vanlalvena (MNF), Rita Malsawmi (MPC) leh Lalhriatrenga Chhangte (independent) te’n hming an pelut a ni.
Candidaite nei partyte zingah Congress, MNF leh BJP te hi recognised party an ni a, ZPM leh MPC te hi registered party an ni.
Tun tum inthlan lo awm tur hi politician ni lo candidate an awm loh kum tiin a sawi theih a, political party liante’n party mi an candidate thap kum a ni.
1998-ah khan politician ni lo Dr H Lallungmuana chu independent ticket-a dingin, PC leh ZNP te’n an thlawp a, a tling. 1999-ah by-election neih a ni a, party mi ni lo Vanlalzawma a tling. 2004-ah Congress-in Dr Laltluangliana Khiangte an candidate a, 2009-ah MNF-in Dr H Lallungmuana, 2014-ah MNF leh ZNP te’n Robert Romawia Royte, 2019-ah MNF-in C Lalrosanga, Congress leh ZPM te’n Lalnghinglova Hmar an candidate.
Hun engemaw lai atang khan party liante’n party mi ni lo an sawm chawp thin a, kuminah chuan ZPM, MNF leh Congress party te’n party mi ni sa an candidate thap a ni.
Inthlan hnuhnung ber 2019-ah khan candidate hi mi paruk bawk an ni a, candidate an tlem ber kum 1980-ah khan candidate hi pahnih an awm. Mizoram state a nih hnuah chuan 2004 khan candidate an tlem ber kum a ni a, mi pathum an awm.