Loneitute thiamna thar pe turin Pre-Kharif Campaign nei dawn
Loneitute thiamna thar pe turin
Pre-Kharif Campaign nei dawn
India ram pum huapa tunlai hmanrua leh thiamna hmanga loneitute puihna tura hmalakna – Viksit Krishi Sankalp Abhiyan – VKSA (Pre- Kharif Campaign) chu Ningani khan district hrang hrangah hawn a ni.
A hawnna pui ber chu KVK Aizawl, College of Veterinary Science & Animal Husbandry CAU, Indian Council of Agriculture Research (ICAR) Kolasib leh Mizoram sawrkar tangho huaihawtin CVS&AH Selesihah hman a ni.
Hmanpuitu Horticulture leh AH & Vety minister C Lalsawivunga chuan kum 2047 hma ngeia ram hmasawn leh intodelha India siam chu sawrkar laipui hmathlir a ni a, VKSA chu he hmathlir tihlawhtling tura hmalakna a ni tih a sawi.
Hmasawnna tehfung pawimawh chu intodelh a ni, tiin, chu’ng zingah chuan ei leh bara intodelh a pawimawh hle tih a sawi. “Ei leh bara intodelh tura thawktu pawimawh chu loneitute an ni a, an thiamna leh theihna tichaka tipung tur chuan sawrkar department hrang hranga mithiamte kaihruaina a tul a ni,” a ti.
Hmanpuitu dang Agriculture & Farmers Welfare minister PC Vanlalruata chuan thu a sawi bawk.
He campaign-in a tum ber chu, ngawrh lehzuala department hrang hrangten scheme tha tak an kalpui thin loneitute hnena hriattir, thlai chin dan tha zawk, thlai chi tha zawk leh tunlai thiamna (modern technology) nasa zawka hman tangkai theihnana inzirtir, sik leh sa inthlak danglamin a khawih chhiat theih loh tur (climate resilient) thlai chin dan hriattir bakah kawng hrang hranga sawrkar leh loneitute thawh hona tichak tura hmalakna a huam a ni.
8 Pre-Kharif Campaign hi May 29 atanga June 12 chhunga neih tur a ni. Thlasik dawnah Pre-Rabi Campaign neih a ni ang.
8 India ram puma distirict 700-a khaw 65000 tuam tura ruahman a ni a; loneitu vaibelchhe 1.5 tlawh chhuah tum a ni.
8 Loneitute tlawh chhuaka zirtirna te pe tur hian mi thiam rualte chu pawlah (team) insiamin an feh chhuak dawn a ni.
8 Mizoramah chuan khaw 737-a loneitu 115200 tlawh chhuah tumin ruahman a ni a. Hemi kawnga thiamna bik nei team 24-in ni 15 chhungin zirtirna pe in an tlawh kual ang.
8 Team-ah hian KVK, ICAR, FPO, SHGs, NGOs, progressive farmers, Rural Youth, entrepreneurs, bank adt. an tel dawn a. Thupui hrang hrang – soil health studies, climate resilience farming, mushroom cultivation, composite culture, integrated farming, vermicompost, animal health, fertilizer, agriculture drone demonstration leh a dangte a awm dawn a ni.