LPS Cup khelh tum team 60 chuang inziaklut
Karleh Thawhlehni, February ni 20, 2024 atanga Aizawla khelh tan tur LPS Cup Inter Village Football Tournament-a chhuah tumte tana inziahluh theih hun hmuhnung ber karliamta Inrinni thleng khan entry fee pein team 62 zet an inziaklut tling a, February ni 16, Zirtawpni zan hian tournament khuhhawnna buatsaih a ni ang.
Aizawl District Football Association (ADFA) chuan 2013 atangin kum sarih a zawnin Inter Village Football Tournament a buatsaih tawh a, NECS Cup tih a ni thin.
Kum 2020 khan round hmasa ber an khel zo hman tihin Covid-19 lengin a tihbuai a, tihtawp a ni. Kum li hnuah tharthawh lehin February 20, 2024 – thawhlehni atangin LPS Cup Inter Village Football Tournament tan a ni dawn.
Tournament hnuhnung ber 2019 khan final-ah minute 120 chhung Republic Veng nen an inkhel a, minute 116-ah Lalmuanzova’n goal awm chhun khungin a vawi hnih nan Armed Veng an champion.
Champion lai Armed Veng, vawi thum champion tawh leh champion tam ber Ramhlun South, 2016 champion Bethlehem Vengthlang leh 2017 champion Chhinga Veng bakah, district dang atanga tel tura sawm Sialhawk, Thenzawl, Kawnpui VC III leh Keifang Joint an inziak lut tawh.
Khaw lian leh mihring tamna ni hlawm lo mah se Tachhip tlang dung atangin anmahni Tachhip bakah zuam sual awl tak Hualngohmun, khelmual nei tha Muallungthu leh Lungleng I an inziak lut tawh a, a tikimtu satliah mai nih an tum lo tih sawiin thlen san ngei tumin an inbuatsaih mek a ni.
2019-a final lut leh 2005 YMA football champion Republic Veng bakah vawi hnih YMA football-a champion tawh Dinthar, Aizawl pawn atanga YMA football champion ni thei awm chhun Lengpui, YMA football-a final lut tawh Vaivakawn, Durtlang, Chanmari West, College Veng leh Tlangnuam te pawh trophy inchuh tur zingah an tel.
February 2 khan LPS Office, Zarkawtah ADFA hruaitu mi paliin referee, match commissioner, Organising Committee leh LPS crew-te hak tur kawr pawt parhin an tlangzarh a, changtlung leh hlawhtling taka tournament kalpui tura peng pakhat a ni, an ti.
Tournament official shirt sponsor Younix Sportswear chuan team tel turte tan man tlawm zawkin Zarkawta an dawrah man tlawm zawkin jersey an thuisak thei tih an sawi bawk.
February 16, zirtawpni zanah Chanmari YMA Hall, Aizawlah tournament pet hawn hmasak tur a ni a, tel duh tan February 10 thleng inziah luhna hun hawn a ni a, team 60 chuang an inziaklut ta a ni.
ADFA chuan : “Thil awm dan atangin team thahnem tak an tel ngei turah kan ngai a, kar khat chhung inpek luhna hun a la awm a, a dawn hnaiah kan inziak lut nasa thei hle a ni,” an ti.
“Veng leh veng, khua leh khaw inelna hi football tihnunna leh talent zawnna pawimawh tak a ni a. Buaina awm thin laka fihlim turin theih ang tawkin kan inbuatsaih a, team tin hnenah buaina pumpelha football tha lantir ngei turin kan ngen a ni,” an ti bawk.
Aizawl district pawn atanga tel tura sawm bikten round of 32 atangin an khel dawn a, Round of 16 atangin LPS Vision-in final thlengin inkhel zawng zawng live-a a pek chhuah dawn bakah, round hmasa ber atangin inkhel a awm ni apiangah report siamin zanah a tichhuak thin bawk ang.
LPS CUP 2024 Team Entry Fee pe tawh
1. Chanmari West LC
2. Zemabawk LC
3. Lawipu LC
4. BVT LC
5. Armed Veng LC
6. Thenzawl Jt VC
7. Sairang VC
8. Tachhip VC
9. Edenthar LC
10. Seling VC
11. Ramhlun ‘S’ LC
12. Dinthar LC
13. Samlukhai VC
14. Bawngkawn LC
15. Tuivamit LC
16. Tlangnuam LC
17. College Veng LC
18. Tuikual North LC
19. Zemabawk North LC
20. Saikhamakawn LC
21. Sialhawk VC
22. Sesawng Jt VC
23. Kawnpui Jt VC
24. Lengpui VC
25. Ramhlun Sports Complex LC
26. Falkawn VC
27. Chhinga Veng LC
28. Keifang Jt. VC
29. Durtlang LC
30. Ramhlun Venglai LC
31. Zonuam LC
32. Maubawk LC
33. Sihphir VC
34. Republic LC
35. Vaivakawn LC
36. Muallungthu VC
37. Tlungvel VC
38. Sihphir Venghlun VC
39. Tanhril LC
40. Chawnpui LC
41. Hualnghmun VC
42. Lungleng I VC
43. Salem Veng LC
44. Ramhlun North LC
45. Ramhlun Vengthar LC
46. Kulikawn LC
47. Chanmari LC
48. Tuikual South LC
49. Bethlehem LC
50. Bungkawn LC
51. Melthum LC
52. Phulpui VC
53. Aibawk VC
54. Nursery Veng LC
55. Kanan LC
56. Melriat VC
57. Lungsei VC
58. Durtlang North LC
59. Mission Vengthlang LC
60. Sairang Sihhmui VC
61. Thingsulthliah VC
62. Dawrpui Vengthar LC