LPS Cup quarter-final hmabak thlirna

Nimin lamah Mahindra XUV3OO LPS Cup 2024
quarter-final match hmasa pahnih khelh zawh niin, vawiin tlai leh zanin hian last eight game hnuhnung pahnih khelh zui leh a ni dawn a, inkhel tur pahnih thlir zui teh ang.
Armed Veng LC vs Kawnpui Joint VC
Trophy humhim turin champion lai Armed Vengin inrintawkna an nei sang telh telh a, vawiin tlai dar 4:30 atangin Kawnpui Joint nen an intawng dawn.
Khua leh veng inelna hrang hrangah YMA football-a champion hnem ber leh vawi nga champion tawh Armed Veng an hlawhtling a, trophy an humhim a nih chuan Aizawl District Football Association buatsaih inter village tournament chanchina champion ngun ber leh vawithum champion tawh Ramhlun South an nih rual dawn a ni.
Round of 16-ah Durtlang nen goal awm loa an inhnehtawk hnuah penalty pet hmangin an tlang a, Divya Player of the Match lawmman dawngtu Lalawmpuia Hnamte chuan, “Inpuahchahna kan nei tha a, kan khel tha telh telh a, champion theih ngei kan inring,” a ti.
Vawi thum an khelh tawhah Armed Vengin goal 10 thunin Richard Lalramnunpuia’n goal nga a tilut a, mimala khung hnem ber zingah a tel.
Rajiv Gandhi Stadium, Mualpuiah sawm bik team Kawnpui Joint-in Armed Veng lakah fiahna an hmachhawn dawn a; round of 16-ah goal thum goal khatin thleng sang tura beisei leh nikum YMA football-a semi-final lut Salem Veng an hneh tawh a, beiseina an nei thar hle.
Thlen san tumin Mizo coach fak hlawh Malsawmkima an ruai a, captain C. Zohmingsanga chuan, “Kan inrintawkna a pun belh zel a, rilru puthmang dik nen khelmualah kan inlan theih avangin beisei kan nei sang a, kan tumah kan chiang hle,” a ti.
Kawnpui hian tournament kal mekah goal riat thun tawhin a zahve chu an striker Lalkrossmawia khung a ni a; Salem Veng an hneh theihna’n Krossmawia bakah Robert Lallawmzuala leh Lalrintluanga’n goal an thun.
Ramhlun South LV vs Vaivakawn LC
Mahindra XUV3OO LPS Cup quarter-final inkhel hnuhnung berah zanin dar 8 atang hian Rajiv Gandhi Stadium, Mualpuiah Ramhlun South leh Vaivakawn an inkhel dawn a, captain pahnih kam chhuak thlir hmasa teh ang.
Ramhlun South captain Lalrohlua Sailo chuan,
“Kan kawr awmah arsi pathum a awm a, pali awmtir ngei kan tum a ni. Tuna kan dinhmunah kan tha tawk a, player kan neibelh (Malsawmfela) a nih pawhin kan that ngaiin kan tha reng tho ang,” tiin
an record kawl lai behchhah ngei an tum thu a sawi.
He tih laih lai hian Vaivakawn captain David Lalrinpuia pawh a zam lo a, zanina an inkhelh tur chungchang sawichhuakin,
“Kan hlauthawng lo a, player langsar nei lo mah ila theihtawpin kan bei a; kan coach-in kan player-te theihna tha takin a hmang thei a, team boruak tha tak nen kan khelh avangin Ramhlun South tan khirh ve tak kan ni ang,” a ti ve bawk.
Ramhlun South tan Aizawl District Football Association buatsaih inter village football a hlu a, tournament hmasa ber kum 2013 leh a dawttu 2014-ah champion zawnin, kum 2015-ah final an lut leh a, vawithum champion zawn an tumna Armed Vengin an dang.
Kum 2018 khan trophy lakir lehin tournament hnuhnung ber kum 2019 semi-final-ah Republic an hneh lo a, kum nga hnuah champion tumin an kir leh mek a, quarter-final-ah team tha leh hriam zawk entir theih an inbeisei sang.
Round of 16-ah awlsam takin Bethlehem an hneh a, Valalthlamuana’n tum hnih pet lutin, Lalremruata, Danny Zorammawia leh JH Remlala’n an khung bawk a, 5-0-in an chak.
Ramhlun South hi YMA football-ah vawihnih champion tawh bawkin, khua leh veng inelnaah Armed Veng ang bawka sulhnu nei lian an ni.
Tun hmaa team tha leh football thiam veng tia hriat hlawh thin Vaivakawn tan kawng hrang hrangin fiahna a tling dawn a; an that vanglaiin YMA football-ah final aia sang an thleng zo lo a, kum engemawzat sawi lansarh an nih tawh loh hnuah kawng an sial thar leh mek a ni.
Round of 16-ah Lalruatkima Dosel chuan rang takin thun mah se Kulikawnin an siphurh an sut ve leh a; Benjamin Lalnunpuia’n hun tawp dawnah 2-1-a an chakna’n a pet lut.
Vaivakawn tan rahbi pawimawh a ni a, team thawhhona hmachhuanin an hmabak hlen turin an inpeih.
Tournament kal meka vawithum ve ve an khelh tawhah Vaivakawn leh Ramhlun South-in goal 12 ve ve an thun a, mimala khung tam ber zinga tel Benjamin-a’n Vaivakawn tan goal nga thun tawhin, Ramhlun South tan Thlamuana leh Danny-a’n goal thum ve ve an khung ve bawk.