Lung in tang leh 6 billion dollar inthleng

American panga Iran a kum tam lung in tang tawhte chu United States panin an haw mek a.
US leh Iran te chuan inremsiamna Qatar-ah siamin US chuan Iranian funds South Korea-a $6 billion zet hrensak chu pekchhuah tirin Doha banks-ah pek a ni.
Hei vang hian Tehran-a US khua leh tui mipa pali leh hmeichhe pakhat te chu chhuah zalen niin Qatar capital pantir nghal an ni bawk a. US official-te chuan an lo dawngsawng a ni.
American te chhuah zalen zingah hian kum 51 a upa sumdawng Siamak Namazi, Tehran a lung in rapthlak Evin prison tia sawia kum riat zet tang tawh bakah sumdawng tho Emad Shargi, environmentalist Morad Tahbaz British khua leh tui nihna nei ni bawk pawh a tel.
US chuan a khua leh tui te chu behchhan mumal engmah awm lova mana tantir an ni tiin a sawi a. Inremna siam hmasak a nih hnuah August thla laihawl vel khan Evin atangin Tehran a hmunhimah dahin an awm tawh a ni.
US-ah pawh Iranian panga lung in a khungin an awm tho bawk a, chung te chu Iran hrekna kalpui dan bawhchhetute niin heng te hi tuna lung in tang inthlengah pawh telin Iran-ah phurh thlen an ni bawk.
“Vawiin hian American pawisawi miah lo panga te chu an lo haw ta a ni” tiin US President Joe Biden chuan a sawi a. Mi panga te chuan tawrhna nasa tak kum nga chhung zet an tuar a ni tiin a sawi bawk.
Biden chuan US hrekna thar puang zui nghalin Iranian president Mahmoud Ahmadinezad leh Iranian ministry of intelligence te chu dik lo taka US khua leh tui te man an nihnaah inhnamhnawih tiin a hrek zui bawk.
Siamak Namazi chuan thuchhuah a siamah, “Khawvelin min theihnghilh in remtihloh avanga vawiina zalen thei mai chauh ka ni” tia sawiin, “Evin Prison bang tihchhiat theih loha chakna nei tura ka beih laia ka aiawha aw in lo chhuah avangin thinlung leh tihtakzetin lawmthu ka sawi a ni” tiin a sawi bawk.
Hei bakah hian President Biden chuan ‘min chhanchhuak tura thutlukna harsa tak siam’ tia sawiin politics aia American khua leh tui te nunna ngai pawimawh zawk tiin a fak bawk.
Lung in tang inthleng tawn a awm theih nan hian nikum February thla atang tawh khan Qatar hmalaknaa inbiakna neih tan a ni a. Doha-ah tum kua lai inbiakna neih nia sawi a ni.
“Ram pahnih ten chakna an chang ve ve in ka hria” tiin Iran a piang Professor Mehran Kamrava, Georgetown University, Qatar a thawk chuan a sawi.
“Biden tan chuan inthlan hmachhawn mai tur a ni a, American te a ko haw thei a, Iran tan chuan US-a a khua leh tui te tang lakchhuah ai mahin 6 billion dollar a neih phah a ni a, chakna turu tak a ni” tiin a sawi.
Iranian official-te chuan an sum hmuh chu an duh dan danin an hmang ang tia an sawi chungin, mahse heng sum hman dan tur hi khauh taka ruahman a ni tih a ni thung.
“Iran hnenah pek vek tur a ni lo” tia sawiin, “humanitarian transaction thil ei leh bar, damdawi, agriculture etc ah chauh hman theih a ni dawn” an ti bawk.
Heng sum hi hrekna avanga Iranian asset khawih chet theih loha dah zinga tel lo a ni a. Heng sumte hi Iranian oil hralhna man niin South Korea-a awm niin non-sanctioned aid atana awm a ni a. Mahse, currency conversion lama harsatna a awm avanga hman loha awm a ni an ti bawk.
US-ah erawh Republicans te chuan inremna chu na taka sawiselin Republican chairman of the House Foreign Affairs Committee, Michael McCaul chuan US sorkar chu firfiakna chhem alh bertu ram hnena sum pe tiin a sawi.
Tehran-ah hian ram hrang hrang khua leh tuite lung in tang thahnem tak an la awm mek a. Chung mite chhuah zalen nan chuan sum hmanga intlan bawk kalpui zui zel a nih hlauhna a lian hle.
“Iranian sorkar hi hostage-taking government a ni ta ber” tiin Sanam Vakil, director of Middele East and North Africa programme, Chatham House, London-based think tank chuan a sawi a. “Mihring te chu chawchaha hmangin chu chu khawthlang ramte laka leihlawn dawh nan berah an hmang a ni” tiin a sawi bawk.
Iran chu Supreme Leader Ayatollah Ali Khamenei-an thuneihna a chan chhung chuan United States nen an inhmelma reng ang tiin a sawi bawk.
Qatar hian theihtawpin khawthlang ram te leh Iran in inbiak pawhna an neih theih nan hma a la thin a ni.