Artui chhungmu ei nasat hian atherosclerosis (conorary artery disease an ti bawk. Chu chu lung (heart)-a thisen leh oxygen supply-tu thisenzam tê lo sawng tê tihna a ni) risk chu meizial zuk ang bawkin a tisang niin an sawi.
Western University, Canada-a Dr David Spence leh a thawhpui te chuan damlo 1200 chuanga zirchianna an neih hnuah artui chhungmu hi meizial zuk tluk zeta lung tana tha lo niin an sawi a, stroke leh heart attack risk pawh meizu mi te ang bawkin a let hnihin a tisang thei niin an sawi a ni.
He zirchiannaah hian mipa leh hmeichhia 1231, an kum chawhruala kum 61.5, London Health Sciences Centre-a University Hospital-a vascular prevention clinics-a inentir thin te chu hman an ni a, heta tanga an hmuh dan chuan meizuk leh artui chhungmu ei hian atherosclerosis a awm tir chak bik niin an sawi a, a bik takin kar khata artui chhungmu pathum leh a aia tam ei teah risk hi a sang lehzual niin an sawi a ni.
Zirchiannaa an hotu Dr Spence, Robarts Reaserch Institute-a Stroke Prevention and Atherosclerosis Research Centre-a director ni bawk chuan, “Artui hi chaw hrisel niin kan sawi thin a, chutihrualin cholesterol lak luh hnem hian cardiovascular (lunglam) natna risk a tisang tih pawh kan hria, artui chhungmu hian cholesterol a pai hnem hle a ni. Diabetics-ah chuan nitin artui pakhat ei hian coronary risk hi a let ngain a tisang thei a ni. Kan hmuh tak chu, kum a lo upat hian kan thisenzamah plaque (plaque chu thau, cholesterol, calcium leh thisena thildang awm ten an siam a ni) zawi zawin a lo bet tam telh telh thin a, artui chhungmu kan ei hian, meizuk vanga plaque a tam chak ang chiahin thisenzamah plaque a siam ta thin a ni,” a ti.
He zirchianna chungchang hi journal Atherosclerosis-ah tihchhuah a ni.
Lung tan artui chhungmu a tha lo
Get real time updates directly on you device, subscribe now.
Prev Post