Ramdanga atanga sahimna zawnga Mizorama raltlan zingah, Lunglei district chhung-a awmte chu felfai zawkin chhinchhiah siamsak bakah thuneitute hriatpui loha an veivak nasa tuk chu vil deuh tum a ni.
District Level Committee on Myanmar and Bangladesh Refugees Lunglei chu an chairman, bawrhsap R Lalthazuala hoin Zirtawpni khan an thukhawm a. Lunglei district-a Myanmar leh Bangladesh atanga raltlan lutte chungchang thil pawimawh an sawi. Sawrkar official-te, Lunglei Local Council Association leh Sub-Hqrs YMA Lunglei aiawh, raltlan buaipuitu ADRA India leh Refugee Welfare Committee aiawh an tel a. Addl DC James Miahlung chuan an district chhunga raltlan dinhmun report ngaihthlak a ni a. Raltlante enkawl, chhawmdawl leh vil zui chungchanga hma lakna tur sawi ho zui a ni.
Lunglei district-a raltlan awmte tan DC office atangin temporary ID siam thin a nih thu sawi a ni a. Raltlante chhinchhiahna felfai zawk a awm theih nan refugee list proforma siama chhinchhiahna – muster roll buatsaih nise, September 15 hma in peihfel tum nise, tih a ni a. Chu muster roll mil chuan dam chin (validity) neiin ID card siam nise, tih a ni.
District chhunga raltlan lut leh chhuak thlithlai leh chhinchhiah tura Village Level Committee din tawh chu tuaithar leh nise, tiin, thuneitute hriatpui loha raltlante an veivak nasa lutuk thin ven nan uluk lehzuala vil zui nise, tih a ni. Raltlante tana chhawmdawlna ruahman chungchang, hri danna (immunisation) pek leh an hriselna endik chungchang sawi ho niin, raltlan camp thenkhata thlanmual leh bawlhhlawh paihna ruahman dan tur sawi ho a ni bawk. Raltlante atanga khua leh tuite chanvo chuhpui a awm lohna turte, ruihhlo leh suahsualna hrang hrang tipunlun leh khawtlang himna tiderthawng zawnga che an awm loh nana fimkhurna leh hmalakna tur sawi ho a ni.
Lunglei DC office chhinchhiah danin
* 2024 August thleng hian Lunglei district-ah raltlan awmkhawmna camp 9 – Vanhne, Ramthar (Nghasih), Phairuangkai, Thaizawl, Haulawng (Saichhoh), Hauruang, Mualthuam North, Khawmawi leh Tlawng a awm.
* Heng camp-ah hian mi 1287 an awm mek a. Camp pawn lam, khaw chhunga in luah leh mi ina mikhual mi 1043 awmin, an vaiin raltlan 2330 awm mek anga chhinchhiah a ni.
* Raltlante tan hian DC office atangin temporary ID 2143 pek chhuah tawh niin, tunah hian ID thar siam dilna 275 a lut leh tawh.
Lunglei district-in felfai zawkin raltlan chhinchhiahna siam tum
Get real time updates directly on you device, subscribe now.
Prev Post