Lunglei district inthlannaa vohbikte tana tih tur sawiho

Lunglei district inthlannaa
vohbikte tana tih tur sawiho
Lungleiah inthlannaa vohbikte (Person’s with Disabilities) chanvo leh hamthatna chungchangah District Monitoring Committee leh Project LEAP hma lak ho dan tur sawiin Nilaini khan Lungleiah an thukhawm.
District election officer, bawrhsap Navneet Mann chuan mipui rorelna atana inthlanna reng reng chu mitin huapzo leh vohbikte tan pawha remchang a nih a tul, tiin, vote neih, inkalpawhna leh chetvelnaah vohbikten an dikna leh chanvo an hmuh a, hmaih bik an nih lohnan sawrkar chuan remchanna siamsak turin theihtawp a chhuah thin tih a sawi.
Thutkhawmah hian District Monitoring Committee on Accessible Election (DMCAE) leh Lunglei district-a vohbikte chawikanna tura hma lakna Project LEAP (Lunglei’s Empowerment for Access and Equity for all Persons) member-te an tel a ni.
District Election Office chhinchhiah danin, Lunglei district-a assembly bial parukah vohbik electoral roll-a inziaklut leh chhinchhiah 397 (Lunglei North-ah 82, Lunglei East 79, Lunglei West 56, Lunglei South 85, Thorang 55 leh West Tuipui 40) an awm.
Hetihlai hian Project LEAP hnuaia kumin January – March chhunga vohbikte dinhmun zirchianna report-a a lan danin, an district-ah vohbik 1262 an awm a. Vohbikte zawn chhuahna tur leh Unique Disability ID card la nei lote siamsakna tura ‘health assessment camp’ kalpui atangin engemawzat hmuh belh an ni bawk.
Project LEAP-a vohbikte chhinchhiah leh Election Office chhinchhiah zat entawnin, kum tling tawh leh vote nei thei, electoral roll-a la chuang lote zawn chhuah a, ziahluh an nih theihnan hma lak nise, tih a ni a. Polling station tinah vohbikte tana awlsamna ruahman a nih dan booth level officer-ten zirchiangin, a tul angin hma lak zui nise, tih a ni.