Ramhluna Hnamte
-- Advertisement --
Mizorama College upa ber dawttu Lunglei Govt. College chuan September ni 10, 2025 (Thawhlehni) khan a kum 60-na, Diamond Jubilee a thleng ta.
April ni 21,1980 (Thawhanni) chawhma lamah kum 25 zet Pathian hruaia ka hna thawhna tur Lunglei Govt College-ah chuan joining report ka pe a. Hetih lai hian mahni khua mah ni se hmelhriat nei lo, tlangval kum 25 mi, zakzum angreng tak kha ka la ni ve a. Khatih hun laia Science Lab. Demonstrator hna chelh mek Pu C.B.Thansanga(L) in min hruai a, min ti tlangnel a, ka lawm tak zet a ni. January thla a lo zawm thar Pu C.Zorema(L), ka junior pui a lo awm bawk a, ka tlangnel ve chu a ni nghal mai. Science faculty bikah chuan P.U.Science chauh kha kan la zirtir a, kan hahdam ang reng viau. Zoology Department ka enkawl a, keimah chauh ka ni a, Head & Tail of the Department ka ni deuh ber. Keimah hian he department hi ka enkawl rei viau mai. Kum engemawti hnuah BSc te introduce a lo nih ve tak hnuah chuan han mal khalh reng theih ni hek lo, sorkarin zirtirtu dang min rawn pek belh ta a, tlem chuan hah a dam ta deuh.
Zoology tih leh Geology tih hi a lam dan a inang deuh lek lek a. Zoology lecturer, guest lecturer ang tur tal a thawk tur kan duh thu kan than a, a rawn chhangtu awm chhun chu kan han bel chiang a, BSc(Geology) a lo ni a! Midang awm chuang hek lo, khatih lai a kan Principal chuan lak mai a rawt a, kan la ta mai a. A ni Geologist nen hian hun reife chu Zoology class kan la dun ta a nih kha. Khatih lai a kan student ho khan an passed ve tho a, vawiin a hna tha tak tak thawk ta te pawh an awm a nia.
Khawhar tak a hun rei tak ka mal thawh hnuah Aizawl nula fel tak, Miss Lalzahawmi Chenkualin min rawn thawh pui ta a, ka lawm ngei mai. Ani hi chu appointment ngata rawn thawk a ni a, Lunglei Govt College chu a ta ang chiaha enin hahnem ngai em emin a thawk ta a, a chhuanawm ngei mai. Ani nen hian Students Study tour te kan hruai dun hin a, khanglai hun kha chuan sum leh paiah tunlai hun ang hian sorkarah harsatna lutuk a la tam lo bawk a, Gauhati Zoo leh Shillong Botanical garden te bakah Cherrapunjee leh a bul a puk hmingthangte pawh kan students te vawi engemaw zat kan tlawhpui thei a ni. Miss Lalzahawmi (tunah chuan Dr.Lalzahawmi Chenkual) rawn thawh ve hnu hian Zoology honours class te hawn a lo ni ve chho ta a, Miss Vanthangpuii rawn thawk ve lehin a hnuah Pu R.Lalrochama, Pu Lalthangliana leh Pi H.Lalhmangaihzuali te an rawn luh belh leh a. Miss Vanthangpuii te rawn luh hma lawk hian Miss Thangrimawii leh Pu Lalramdina te pawh an lo thawk bawk. Anni pahnih leh Miss Lalzahawmi te hian Aizawlah min insawn san leh ta a ni. Hun rei tak keimah chauha ka lo enkawl thin Zoology Department chu lecturer 5 lai awmna, University norms anga zirtirtu nei kan lo ni ta a ni.
HLIMLAI NI :
Ka thawh tirh laite kha chuan keima hahnem ngaihnain Lunglei khaw chhehvelah ka students te local field trip ka neih pui hin a, pawisa thawhkhawmin chawte kan fun a, rannung leh thlaite kan ‘collect’ hin a, chungte chu awihtheihlohna hloah kan chiah a, khang hun laia kan ‘collect’ te kha vawiin thleng hian Zoology Dept. museum-ah a la awm hlawm a ni. Local field trip-ah hian Hmawngva, Mat leh Khawiva ah te kan kal hin deuh ber. Mat kan kal um hian Tuipui Balu phur tur truck-ah kan chuang a, Mat chu hma takah kan thleng a, rannung leh thlai lam collection kan han nei a, kan collection pawh hemi tum hian a ha khawp mai. Khami um a kan specimen collect ho kha chu a hlu bik riauin ka hre hin. Kan collect zinga ka la hriat reng chu Mat lui kama tit (Scolopendra) lian chungchuang tak kan collect kha a ni. Zoology museumah khan la vawng ha tak maw.
Khatia students te local field trip ka neih pui hin kha an lo hlawk puiin an lo phur phah em em a ni tih tunhnuah ka hre thar fo a, chhunzawm theih zel pawh a hat vei nen, kan thawk rei tial tial a, an mar pat reng hi chu thil har tak a lo ni a, kan chhunzawm hlei thei ta lo a ni. Local field trip hi a hlawk a, tuna science lecturer la halai deuhte hi chuan kum khata vawi khat tal chu hetiang trip hi han neih pui thei hin se, a ha ngawt mai.
Lunglei Govt College hi kei chuan ka theihnghilh ngai tawh dawn lova, ka sorkar hnathawhna hmasa ber, kum 25 zet hun ka hmanna, ka hat lai hun leh vanglai hun ka hmanna a ni a, mumang lamah pawh kan mang bang thei lo a nih ber hi. Thiam leh thiam lo a carrom board kan khelh ve hin lai a awng thar kan chher chhuah nasatzia te, a hnu deuhah playing card khelh kan atchilh lai, hian henkhatte phei chuan an addict hneh tawh luattuk avanga holiday hreawm an tih theih zia te kha aw…., sawi tur a va tam ve.
Khatih lai khan, 2004-a, kan Directorate-a Joint Director hna a chelh laia min boral san ta Pu C.Zorema nen khan a junior ber kan ni a, tlangval kan la ni bawk a, kan inzui bik deuh chawt a. Kei, khatih lai hun pawh a ‘tunlai’ ve tak, kohhrana in hmang lem lo leh tleirawl sual pawh nei lo, kohhran mi leh inhmang tak C.Zorema nen khan kan inkawp miau mai a. RTP Cinema hall-ah khan film hmuhnawm tak tak an chhuah hin a, chungte chu Zorema nen chuan kan hun awlah kan en hin a. Kohhranin film ha loa a ngaih deuhte pawh kan en a ni mahna. Khatia kan inkawp kha an kohhran lam hruaituten an lo khak deuh a ni awm asin, chu chu ama awngkam ngei aangin ka hria a ni. Mahse C.Zorema ka kawm aang khan Pathian lam hawi chakna ka neih phah a, kohhranin suala a ngaih thil henkhat ka lo chin ve hin pawh ka sim phah nual a ni.
LUNGLEI GOVT COLLEGE KA MANGTHA TA :
Chutia hlim taka kan thawh ho dial dial lai chuan Lunglei Govt College chu chhuahsan a Directorate lam a ka thawh a lo ngai ta tlat mai. A college hrim hrim bakah thawhpuite leh students te ngai em em chungin April ni 30, 2005 khan ka chhuahsan ta a, May ni 2, 2005 ah hna thar ka lo vawn san ta a ni. Lunglei Govt College ka chhuahsanna pawh kum 19 zet a lo vei ta reng mai. Zirtirtu ka nih lai kha ka ngaih em em chang a tam mai. Hetia Diamond Jubilee hial an lo thleng ta hi Lunglei Govt. College zirlaite leh Zirtirtu leh staff zawng zawngte ka lawmpui tak zet a, Jubilee tam tak hmang turin ka duhsakna hlan pahin ti hian kan thawh ve lai chanchin tlem te ka rawn ziak ve a ni e.
Kum 25 ka thawh chhungin Principal 7, Pu Lalawia, Pu Darchhawna, Dr.Lalrimawia, Pu R.Biaksanga, Pu J.S.Pandey, Mrs.S. Pandey leh Pu C.Hrangdula te ka hrawn ve hman a ni.
Heng ka Principal hrawn tawh zawng zawngte hi ka fak hlawm hle a, an hnuaia thawh kha a n