Lunglei Police hmalakna thar hawng

Lunglei Police Station chhawng khatna thawmthat hna thawh zawh tawh leh Lunglei District Police leh mipuiin internet khawvel tangkai lehzuala an hman tur ‘WhatsApp Chatbot’ chu Nilaini khan Mizoram director general of police Anil Shukla chuan a hawng. Chatbot hi awlsamtea mipuiin police an biakpawh theihna atana siam niin, hei bakah hian Lunglei District Police official Facebook handle siamthar pawh a hawng nghal a ni.
WhatsApp Chatbot hi Freshwork Delhi nen tangduna siam niin, mipuiin awlsam zawka police nena an inbiakpawh theihna tura duan a ni. Police hnena thu thlen duh hrang hrang – tualthah, pawngsual, rukruk kaihhnawihah awlsam taka thlen theihna hmanraw tangkai ni tura ngaih a ni. Lunglei Police Facebook page-ah police leh dan leh hrai kaihhnawih thuthar leh thil thleng hrang hrang chhiar theiha chhawp chhuah thin a ni dawn a, mipui leh police-ten zai khata sual do kawnga ke an pen ho theihna atan hman tum a ni.
DGP chuan police station mawi tak, mipui tlawh chaka siam a ni chu lawmawm a tih sawiin, hetianga hmunhma tha an neih theih nana hma latue chungah lawmthu a sawi a. Police chu mipuiin min ring ngam se, tupawh Police Station-ah tlangnel taka an luh ngam nan inbuatsaih turin a chah tih a sawi.
Lunglei chu ruihhlo leh zu laka khawpui fihlim ni tura hma lak a ngai, tiin, VDP nen thawhhona tha nei a, kan tu leh faten ruihhlo laka an fihlim theih nan hma lak a ngai tih a sawi.
Kumina Lungleia VDP, zu leh ruihhlo man kawnga thawk tha Chanmari VDP hnenah lawmman pek a ni a; Lunglei District Police chhunga zu leh ruihhlo man kawnga police thawhhlawk berte chawimawina pek ni bawkin, ASI Zothansanga DSB, head constable Vanlalthuama DSB, C/163 F Lalhruaitluanga Lunglei PS leh C/227 HC Vanlalchhuanga Lunglei PS te hnathawh that azarah kumin chhung khan zu leh ruihhlo case 11 ziahluh niin; zu um 218, rakzu litre 184, beer cane 4, buhzu litre 30, a vaiin zu leh ruih nana hman damdawi an man hi Rs. 4,25,890 hu a ni a. Heroin grams 472.9009, a vaiin Rs. 17,84,800 hu an man bawk.
DIG Southern Range H. Ramthlengliana leh Lunglei SP Rahul Alwal te pawhin thu an sawi a. SP chuan a taka hmuh theih changkanna hmunhma tha neih kawnga hma an lakna leh tangkai lehzuala technology hmang tura hma an lakna chu Lunglei District Police tan hmasawnna ropui tak a ni a, DGP-in a hmuhpui chu an lawm takzet tih a sawi a ni.
DGP Anil Shukla hian SP office leh 2nd Bn MAP Luangmual tlawhin an hmunhma leh pisa a fangkual a, thawktuten an duh leh mamawh te a hnenah an lo thlen a ni.