Lungrual loh vangin thuneihna hloh ti

India rama Opposition te chu an inlungrual loh avangin thuneihna an chân a ni tiin Nobel laureate Amartya Sen chuan a sawi a. Congress te chuan organisation lamah harsatna chinfel tur an nei a ti bawk.
PTI tena an kawmnaah Sen chuan caste census chu ngaihtuah zui tur chi tia sawiin mahse India chuan a mirethei te chu zirna tha pek, healthcare leh gender equity te hmangin a tichak thei tiin a sawi bawk.
Economist ngaihsan hlawh em em chuan democratic India khua leh tui a ni chu a inchhuan thu sawiin mahse India democratic nature tichak zel turin tihtur a tam a ti thung a.
Sen chuan opposition bloc INDIA chu a tira tel te JDU leh RLD ten an chhuahsan avangin an beisei angin boruak an siam theihloh phah a ti bawk a.
“An inlungrual loh avangin Opposition ten BJP lakah an hloh reng a ni. Inlungrual se chuan chak tak zawk tur an nia. Congress pawhin organisation lamah harsatna chinfel tur an nei a. Tun hmaa Congress ropui tak te kha insiamthat nan hmang thiam se a tha” tiin a sawi bawk.
Sen chu BJP kaihhruai NDA sorkar lai mek economic policy te sawiseltu langsar tak a ni bawk a. Lehkahthiam lo la tam lutuk te gender inequality la nasa te chu India mirethei te changkan theih loh chhan a ti bawk a.
“India ruling class te hian mihausa te interests chauh an ngaihtuah a. Lehkhathiam lo la tam te, hrisello bawk si te, gender inequality sang lutuk te chu Indian mirethei te hmasawn theih loh chhan a ni” a ti.
Opposition ten BJP te chuan thuneihna an chang leh a nih chuan Constitution an thlak danglam ang an tih chungchang zawhna chu chhangin Sen chuan, “Indian Constitution thlak chu sorkar in class priority a pek leh sakhua pakhat chauh tihbik a neih nena insirem tur a ni ang a, chu chuan India mi pangngai te ten engmah hlawkna a thlen dawn lo” tiin a sawi.
Poll issue pawimawhah Caste census Opposition tena an aupui ber chungchangah pawh Sen chuan, “Caste census chu neih a tha mai thei, mahse, India hian zirena tha, healthcare tha leh gender equity te hmanga mirethei te khaichhuah tum a mamawh ber” tiin a sawi.
Congress leader Rahul Gandhi chuan an party-in thuneihna an chang a nih chuan ram pum huapin caste census neih a ni ang a ti a. Mahagathbandhan sorkar JDU, RJD leh Congress leh Left te intelkhawmna khan nikum khan Bihar ah caste census an lo kalpui tawh a ni.
BJP te chuan economic lama an chethat lohna te chu majority Hindu te tilawma Ayodhya Ram Mandir sak leh Citizenship (Amendment) Act kalpui te hmangin an khuh thei ang ber tia zawhna chu kum 90 a upa prodessor chuan India chu secular zung nei leh culture hrang hrang awmna a ni a ti a.
“India hi secular ram secular Constitution nei a ni a, Hindu identity chauh thlurbing chu majority Hindu te tan chuan a awlsam ang a, mahse, chu tak chu India secular roots leh multicultural a nihna phatsanna a ni” tiin Harvard University professor chuan a sawi bawk.