Lungsen-ah school a kangral

April 20 zing khan Lunglei district Lungsen khuaa Govt Middle School-II chu bungraw engmah chuh hman lohin a kangral.
Lungsen atanga thudawn danin, kangmei chhuah hun hi zing dar 6.30 vel a ni a. A kan chhan hriatchian a ni loa, electric current kalsual vanga kang a nih rin a ni. Kangmei a chhuak tih hriat a nih hian thelh theih loh khawpin a kang nasa tawh a, khawtlangin an hriat veleh rang takin thleng mah se, thelh mih theih a ni tawh lo.
School building leh bungraw kangral hlut zawng hi cheng nuai 45 vel nia chhut a ni a, bungrua hi a kang chhe hneh hle a ni.
Thawhtanni khan Lungsen Educational Staff Union leh mi tlawmngaiten bungraw dahfel hna thawkin hnatlangte thingpui inna hi Thorang bialtu MLA Er R Rohmingliana’n a tum a; mamawhna apianga hman atan ZPM Gen. Hqrs. vice president C Lalnunnema’n sumfai a pek bakah ZPM Thorang Block-I in sumfai an hlan bawk.
Govt Middle School-II kang hi School Education minister leh DM&R minister hrilhhriat nghal a ni a, a hmunah DEO Lunglei leh SDEO Lungsen chuan an enfiah a, school naupangten zirna an chhunzawm dan tur an ngaihtuahpui nghal a ni.
MZP Hqrs. Lunglei chuan Govt Middle School-II bungrua engmah chuh hman loha a kangral chu pawi a ti hle tih a sawi a. He chhiatna thleng avanga an zirlai puiten harsatna an tawh mek chu a rang thei ang bera thuneituten zirchiang a, zirlaiten an zirna an chhunzawm leh thuai theih nan hma la turin thuneitute a ngen tih a sawi.