Madhya Pradesh-in khawkheng tuar mek ti

Chief Minister Shivraj Singh Chouhan chuan khawkheng dinhmun an tawn mek thu sawiin chuvang chuan Madhya Pradesh-ah power crisis a thleng mek a, hei hi thla kalta atanga ruahsur mumal loh vang a ni tiin a sawi.
State sorkar chuan State dang atangin power lei a tum thu sawiin mahse state dang pawhin harsatna an tawk ve tho tiin Chouhan chuan a sawi bawk. Madhya Pradesh-ah hian tun kum tawpah inthlanna neih ve tho tur a ni.
“August thlaah ruah a sur bar lo va, hei vang hian Madhya Pradesh chu khawkheng dinhmunah a ding mek a. Mahakal hnenah tawngtaiin ruahsur tha leh thlai te him a nih theih nan ka dil a ni,” tiin Chouhan chuan a sawi a.
“Thingtlang khua leh khawpuia awm te pawh tih thin danin ruah a sur theih nan tawngtai turin ka ngen a. tawngtaina te chhanin a awm thin a nia. Rilru leh tihtak zeta tawngtai a nih chuan pathianin ruah a surtir em em ang,” tiin Chief Minister chuan a sawi bawk.
State sorkar chuan loneitute hma ngaiin a thawh reng tur thu a sawi a. “Ruahsur tlem avanga hasratna awm thei te sawihona kan nei a. Dam atanga tuichhuaha thlaite chhanhim a nih theih nan thupek ka pe a ni,” tiin Chouhan chuan a sawi bawk.
Chouhan chuan tun ang hunah power 8,000-9,000 MW vel mamawh a ni tlangpui a, kuminah erawh 15,000 MW vel mamawh a ni thung tiin a sawi a. Demand-supply karawl a san avangin loneitu ten electricity supply mamawh tawk an nei lo, tiin Chief Minister chuan a sawi bawk.