Madrid-ah Mbappe tak tak inlar chhunzawm zel

Madrid-ah Mbappe tak tak inlar chhunzawm zel
Spain leilungah ropui takin bul tan chiah lo mah se Kylian Mbappe chuan a ni telin Spanish fans hmuhah theihna a pholang thuk zel a, Inrinni zan La Liga lamah pawh a goal thum thun hmangin Real Valladolid mualah sithum faiin Real Madrid a chakpui leh tawh a, league table-ah Bernabeu club hian point li laiin hma an hruaifal ta.
Real a zawm hnua a club thar tana France captain hat-trick hmasaber intanna goal hmahruai hi darkar chanve an khel tling chiah tiha Jude Bellingham siamsak atanga a tihluh niin, chawlhlawk hnu lawkah Rodrygo pass atangin a goal hnihna a chhuihlut leh.
Mbappe hat-trick siamna goal hi hun pekbelh penalty atanga a chhuihluh niin, Bellingham laka foul Real loanee Mario Martin chu red card hmanga hnawhchhuah a nih rualin penalty a chhuahsan tel a, French striker chuan Valladolid goalkeeper Karl Hein-a tluk lohna lama chhuihlutin Real tana a hat-trick hmasaber a lawm thei ta a ni.
Municipal Jose Zorrilla stadium chhung mipui 26,025 hmaa a goal hmahruai tihluh leh nen Kylian Mbappe khan tun season La Liga bikah match nga chhung chu goal hmasaber a thun ta a, belhkhawmin league kal laiah goal 15 khawl tling tawhin, La Liga top scorer ni mek Barcelona goal thun khawl Robert Lewandowski lakah goal khat chauhin a hniam tawh a; inelna hrang hrangah belhkhawmin Real tan goal 22 zet a thun tling tawh bawk.
Inrinni inkhel dangah table-a pahnihna luahtu Atletico Madrid chuan 1-1-in an mikhual Villarreal an inhnehtawkpui ringawt a, point 49 nei tawh Real nena an inthlauhna a san phah sawt a; he thu buatsaih laia la chechhuak lo team pahnih Barcelona leh Athletic Bilbao chuan point 39 ve ve nei chungin pathumna leh palina an luah a; nizan result tarlan hman lohah Barcelona-in Valencia an mikhual a, an chak chuan hmahruaitu team nena an inthlauhna an pawtzim leh hlek ang.
Champions League lamah league stage round hnuhnungber khelh a hun chho leh nghal ruai dawn a, tualchhung league lama hnehna nuamsa an chan zawhah Carlo Ancelotti team hian Nilaini zanah Brest an luhkhung dawn a, an chak chuan play-off khelh buai ngai loa round of 16 luh phakna tur top-eight hmun chan theihna ‘chance’ an nei dawn a ni.
Tarlan tawh thin angin, Paris St Germain player hlui Mbappe khan Spanish capital-ah mi fak hlawh hluai zawngin bul tan ropui hluah lo mah se tunhnai thla hnih chho hian a habbit ngai ‘goal thun zel’ kha a rawn zawh dik chho leh tawh a, Real Valladolid laka hat-trick a siam hma chiaha an league game hnuhnungber Las Palmas lakah pawh khan goal hnih thun tawhin, Spain leilunga a season khatnaah league title hlawhchhuak nghal thei turin a team chu kawng dik a zawhpui leh mek a ni.
Inrinni zana a hat-trick siam avang khan a hlim hle tih sawi chungin chu aia a lawmna chu hnehna an chang leh Atletico chak zo lo kha niin a sawi.
Carlo Ancelotti team khan inkhel an thunun hneh hle a, ball pawh 70% dawn changin, goal thun theihna hun remchang an siamchhuak deuh reng bawk a, khati chunga goal thum lek an thun leh goal zawna vawili chiah ball an thawnlut kha tlarhma lam inzihthat deuh an la mamawhzia a lang!
Valencia game-a a red card hmuh vangin Vinicius Jr a la chechhuak thei lo kha an tuar deuh bawkte pawh a ni mahna…