Malaria tamna ber Mizoram
Mi 1000 zela malaria vei hmuhchhuah zat atanga chhutin, India ramah Mizoram chu malaria tamna ber state a ni mek.
April 25 hi ‘World Malaria Day’ a ni a, khawvel pum huapa malaria dona ni atana hman a ni. World Health Organisation (WHO) hnuaia World Health Assembly chuan kum 2007 khan malaria (sikserh) chungchanga inzirtirna leh hriat tur tul inhrilhhriatna atan World Malaria Day hman a rel a. Kum 2008 atang khan kumtin thupui neiin hman thin a ni. Kumin thupui chu “Hriselna kawnga intluktlannan, malaria tibo tura chak zawka hma lak” tih a ni.
Aizawlah chuan Vector Borne Disease Control Programme, National Health Mission-in an hmang a. Health & Family Welfare principal secretary Esther Lalruatkimi’n a hmanpui. NHM mission director Dr Eric Zomawia’n Mizorama malaria dinhmun powerpoint a pe in a sawifiah.
Tun dinhmunah India ramah mi 1000 zel atanga malaria vei hmuhchhuah zat chhutin, malaria tamna ber state nihna kan hauh mek tih a sawi a. Hei hian malaria dona kawnga tan lak a ngaih nasat zia a lantir tih a sawi. 2023 January – December chhunga malaria natna vei hmuhchhuah zawng zawng chu 18005 niin, mi 13-in nunna an chan. Kum 2022 nena khaikhinin malaria vei hmuhchhuah tam zawng hi zaa 76.02-in a pung.
Kumin January & February chhung khan malaria vei hmuhchhuah 1776 awm tawhin, nunna chan erawh an awm lo.