Mallorca muala chak nuamsa Barca

Mallorca muala chak nuamsa Barca
Thawhlehni zan Spanish La Liga match-ah hmahruaitu Barcelona chuan 5-1 tehrengin mualneitu Mallorca an sawp a, mikhual team tan captain Raphinha chuan second half-ah goal hnih a thawh.
Estadi Mallorca Son Moix inkhela an hnehna sualchhuah hi thla khat dawn hnua La Liga bika Catalan team an chak leh vawikhatna chuah niin, he match-a goal li hi second half-a an tihluh a ni.
Barca manager Hansi Flick chuan inelna hrang hranga a match khelh hnuhnung 20-a luhhmasak chang fai vek La Liga top-scorer Robert Lewandowski a chawlhhahdamtir a; kheimit hliam avanga thlakhat dawn chawl tawh Lamine Yamal erawh starting team-ah a kir thung.
An rawlthar star Yamal awm loh laiin Barca an talbuai a, an match hnuhnung pathumah point khat chauh thawkchhuakin, kum 17 mi an chhawr leh tan theih zanah chiang fahranin hnehna an chang!
Nou Camp club hian point 37 hum chungin league table-ah hma an hruai chhunzawm a, an hnuai chiaha pahnihna luahtu Real Madrid lakah point liin sang mah se he thu buatsaih lai thlengin Real hian game hnihin an la khel tlem zawk a, Barca hmahruaina hi nghet tak a ni hran lo!
Pathumna Atletico Madrid-in point 32 an khawl ve tawh.
Thawhlehni inkhelah bench-a thu Lewandowski aia lut Manchester City forward hlui Ferran Torres chuan minute 12-na lekah mualneitu team tlarhnung buai nangfuhin Barcelona goal khatna a khung a; chawlhlawk dawnah Mallorca lamin counter attack rang zet nen an nawr thut a, Pablo Maffeo siamsak atangin Mallorca striker Vedat Muriqi chuan home team siphurh a sut.
Second half-a chak mamawh Barca erlet hi a na hraih hraih hle a, minute 56-a Lamine Yamal hlawhchhuah penalty atangin Raphinha chuan mikhual hmahruai nawnna goal chhuihlutin, minute 74-ah Yamal-a chhawpsak atang bawkin Brazil international hian a goal hnihna a thun a, season kal laiah league goal 11 a tilut tling ta a ni.
Hun tawp hnaih lama substitute pahnih Frenkie De Jong leh Pau Victor-te goal khat ve ve thawh leh nen Hansi Flick-a team zinchhuakin goal nga an thun tling a, inrintawkna neilet leh turin hnehna an chang.
Barcelona hian kartawp Inrinni zanah Real Betis an luhkhung leh dawn a, Celta Vigo khelmualah Mallorca an lut thung ang.