Mamata Banerjee-in doctor te ka vau lo ti

West Bengal-a doctor lungawilohna lantir te chuan Chief Minister Mamata Banerjee-i’n hnathawk chhunzawm tawh tura a ngenna chu an hnawl a. Banerjee chuan doctor-te chu Supreme Court-in ngenna a siam anga an hna chhunzawm turin a ngen a ni.
“Supreme Court-in junior doctor te chu hnathawk chhunzawm turin a ngen a. Mi tam tak enkawl ngai leh mamawh thi mai thei an awm mek a, mirethei te te an ni a, private healthcare man to tak tak a inenkawl thei an ni ve lo” tiin Mamata chuan a sawi a.
Chief Minister chuan, “Supreme Court chuan a hma pawhin State sorkar chuan a tul chuan chet la turin thuneihna a nei a. FIR ka thehlut a nih chuan an hma lam hun a khawih pawi thei a, passport, visa an hmu thei dawn lo” tiin a sawi bawk.
“Vawiin thlengin in lakah engmah tih kan la nei lo. In duh leh phut te hi ka hre thiam a, justice in duh a ni. Tunah chuan hnathawk turin let leh tawh rawh u,” tiin Mamata chuan a sawi bawk a.
Mahse lungawilohna lantir doctor te chuan tlawm mai an tum lo va, a chhan ber pawh an demand te tihhlawhtlinin a awm lo an ti thung. Kolkata a protest march an neihnaah Banerjee thusawi chuan a tihhnual thu an sawi bawk a. Shyambazar a rally neihnaah doctor-te chuan Chief Minister chuan ‘a rukin a vau a ni’ tiin an sawi a. Sorkarin an demand a tihlawhtling lo a nih chuan hna an thawk chhunzawm dawn loh thu an sawi zui bawk a.
“Commissioner of Police Vineet Goyal a ban kan phut tlat a. Principal hlui Sandip Ghosh chu man emaw suspend emaw a la ni lo va, CBI leh ED office a kartawn reng mai zawk a. Eng vangin nge tun thleng thlenga suspend a la nih loh? Pawngsual leh tualthahna thlenga mawhphurtu chu tun tlengin manin a la awm lo va, finfiahna thukruk tum mi thenkhatte pawh manin an la awm lo,” tiin doctor te chuan an sawi ve thung.
“CM Mamata Banerjee thusawi hi a ruka invauna a ni a, doctor te lakah hremna emaw lekkawh a la nei lo va, a duh a nih chuan a la ti em em thung ang. Hna kan thawh chhunzawm theih loh chhan hi kan thiam loh a ni lo va. Hmalakna tha awm se kan thawk em em ang,” tiin an sawi bawk.
R.G. Kar Medical College and Hospital a thawk resident doctor pakhat pawhin Chief Minister thusawi chuan a tihhnual thu a sawi a. “Min tihnual takzet a ni. Tun ang hunah hian sorkar hi kan lam tang tur zawk a ni,” tiin a sawi.

Doctor te vau lo
West Bengal Chief Minster Mamata Banerjee chuan junior doctor te chu a vau lo tia sawiin, ni 21 lai hnathawk duh lova awm tawh doctor te vau anga an sawina chu ‘dawt muhlum’ tiin a sawi.
“Medical students emaw an movement kalh zawngin tawngkam khat pawh ka la chhakchhuak lo. An movement hi ka thlawp zawk a ni. An movement hi a genuine bawk a. Ka vau ngai lo va, mi thenkhatin vau angin min chhuah a , chu chu dawt muhlum a ni” tiin a sawi.
Banerjee chuan, “BJP te kalh zawngin tawngkam ka nei a. An kalh zawnga ka tawngna chhan pawh Government of India thlawpna an neih nen kan State a democracy vauin anarchy din an tum vang a ni. Centre thlawpna hmangin kan state-ah dan awmze nei lova siam tumin chu chu duh lovin ka tawngchhuak a ni,” tiin a sawi.