Manipur-a Zofate inring rengin awm

Manipur-a Zo hnahthlakte leh Meitei te kar a la lum reng a, nasa taka inkah a awm rih lo na a, inring rengin an awm.

Manipur-a Zo hnahthlak hruaitute chuan, ‘Inkah bur bur chu a awm lo a, mahse inring rengin kan awm, alert rengin kan awm,’ tiin an dinhmun an sawi.
Hun engemaw chen an boruak a daih deuh hnuah chawlhkar hnih vel liam taah khan an boruak a lum leh a, hmun thenkhatah an inkap leh. Hemi hnu hian a lehlam lehlam hi inring rengin an awm tha leh a, mahse nasa taka inkah chu a awm rih lo.
Kar hmasa hmasa lehah khan Jiribam-ah Zo hnahthlakte leh Meitei hi an inkap a, Meitei pathumin nunna an chan. An inkap zo hi Meitei lamin Zo hnahthlakte hi kawngah an lo lambun a, mi paliin nunna an chan. Heng lai vel hian an boruak a lum leh a ni.
Zo hnahthlakte sawi danin, khawi khawiah emaw chuan silai a puak deuh reng a, inkah zeuh zeuh chu a awm reng. Mahse nasa taka inkah chu a awm zui rih lo.
Churachanpur district chu a ralmuang rih a, Kangpokpi district leh Jiribam district lamah silai ri hriat tur a awm thin an ti a, heng district pahnihah pawh hian khawpui chu a ralmuang a, Meitei awmna nena khaw inhnaihah nasa lem lova inkah hi a awm deuh reng an ti.
An boruak a daih lai pawhin a lehlam lehlam hian mahni khuaah duty an indah reng tho a, tun hnaia an boruak a’n lum leh deuhah hian Zo hnahthlak lam chuan duty indah belh emaw an nei rih chuang lo a, inring rengin kan awm an ti.