Manipur buaina hmanga politic khel lo turin Congress chah
Manipur buaina hmanga politics khel tawh lo turin Mizorama Congress party chu an chah tih BJP Mizoram president Vanlalhmuaka chuan a sawi.
August 11-a an party office-a inkhawmah BJP Mizoram State president chuan Manipur buaina chu sakhua leh sakhua buaina niloin, chi leh chi, hnam leh hnam buaina a ni a. Manipur-a buaina avanga tawrhna rapthlak tak thleng mek chu BJP chuan pawi a tiin, he buaina chingfel tur hian buaina tuar mektuten Prime minister hi an ringtawk a, an au mek tih a sawi. “Manipur-a chi leh chi intihbuaina hi hun reilote ah PM kaihhruaina hnuaiah chinfel a ni dawn tih kan sawi rualin, Manipur buaina hmanga politics khel tawh lo turin Mizorama Congress party hi kan chah a ni,” a ti.
Tunhnaia MPCC president Pu Lalsawta’n BJP sawrkar paihthla tura political party intelkhawm tura a sawmna bakah BJP thlipui dolet tura political party mai ni lo, kohhran leh tlawmngai pawl a sawm chu political party thi tur chalchang au aw a ni tih Vanlalhmuaka hian a sawi a. “Politics khel tura kan ngaih loh kohhran leh NGO-te hial politics a kaihluh an tum hi an mize thalo tihlanna a ni,” a ti.
MPCC president-in India ram pum bakah Mizoramin hma hun thim leh khirh tak a tawng mek tih a sawi chu Mizo mipui hruaikawi tumna a nih thu sawiin, Mizorama hun thim leh khirh kum 20 chuang thlen tirtu chu Indira Gandhi kaihhruai Congress an ni a, Mizoramah hun thim leh khirh tak kan hmabak mek a nih chuan Mizoram min lo kaihhruai tawhtu Indian National Congress leh tuna sawrkarna chelh mektute vang a ni ang, tiin a sawi bawk.
India rama bawng talh khapna dan state 22-a siamtu chu Congress an nih thu te, India hmarchhaka Kristian-te bitna state Mizoram leh Nagaland mi dim baksak loa sawisatute leh jet fighter leh bomb hmanga Mizoram bei chiamtu chu Congress an nih thu leh, hmarchhak state Armed Forces Special Powers Act siamsaktu Congress an nih thu BJP hruaitu hian a sawi. “Vawiin thleng hian March 5-a Congress sawrkar thil tih avanga Mizo mipui rilru na dam thei lo leh hriatrengna hun kan la hman avang hian Congress party hian an thil tihsualah Mizo mipui chungah ngaihdam dil rawh se,” a ti.