Manipur buainaah Biren Singh inrawlh
Manipur-a Kuki-Zo MLA 10 te chuan thuchhuah intawm siamin tun hnaia voice clipping putru Chief Minister N. Biren Singh thusawi ni ngeia ngaih chuan Manipur a ethnic conflict ah a inhnamhnawihzia a pholang tiin an sawi.
MLA rualte chuan Chief minister Biren Singh chu Manipur-a buainaah a inhnamhnawihzia phatrual a ni tawh lo tia sawiin Cente-in Commission of Inquiry a din te chuan a rang thei ang berin suahsual rawngbawlnaa Chief Minister of Manipur inrawlh chu hrem a nih ngei theih nan a chak thei ang berin an kalpui tur a ni an ti a. MLA rual te chuan Chief Minister chu ban ni se tia ngiat bawkin tichuan ama chhuina tikhawbaw thei lovin a awm dawn a ni an ti bawk.
“State-sponsored ethnic cleasing-ah Chief Minister inrawlh ngeia kan hriatna chu tunah chuan phatrual loha lailanin a awm ta a ni” tiin MLA rualte chuan an sawi bawk a. MLA rual zingah hian Singh Cabinet a Minister pahnih te pawh an tel a ni.
He tape leaked hi a dikzia pawh Biren Singh unaupa ngei Rojendro Nong pawhin a nemnghet tiin an sawi bawk a. MLA Nong hian he tape hi a dikzia hriain ‘he tape hi Facebook a hralh te chu a vau a ni’ an ti bawk.
Biren Singh thusawi ni ngeia ngaih tape leaked hi kar kalta khan social media-ah thehdarh chiam a ni tawh a, he tape hi Centre-in Justice Ajay Lamba kaihhruaina hnuaia a din Commission of Inquiry hnenah ‘Manipur Tapes’ tia thehluh a ni tawh bawk.
A tirah chuan Manipur sorkar chuan he clipping hi siam danglam tia sawiin chhui chian mek a ni an ti a. A hnu pawha The Wire-in he tape chungchang hi a ziah hnuah leh Justice Lamba Commission hnena affidavit ruala thehluh a nih hnuah Manipur sorkar chuan siam danglam tiin nasa zawkin a sawi zui bawk a ni.
Manipur-a valley-based Meitei leh hills-based Scheduled Tribe Kuki-Zo cummuity te inbeihna chuan kum khat a chuang tawh a. Mi 200 chuangin nunna chan phah tawhin mi sang chuangin hliam an tuar a, mi sing tam fe chu chenna in leh lo chhuahsana siamin an awm mek bawk.
Kuki-Zo MLA te chuan tape chuan Biren Singh-an tribal Kuki-Zo cummunity te hnam anga sawisak an nihnaah a insawipawr hle tiin an sawi bawk a. A thenah phei chuan Union Home Minister Amit Shah-an Kuki-Zo area beih nana bomb hmang lo tura a tihna te sawiin mahse Union Home Minister in Manipur a chhuahsan rual rualin police hotu lawk te chu Union Home Minister thupek kalhin bomb-te chu hmang tura a tih thu te a sawi lang a ni.
Hei mai bakah hian Chief Minister chuan State armouries atanga ralthuam 5,000 chuang rubotute man an nih loh nan Chief Minister chuan hma a lak zawk thu te a sawi tia sawi a ni bawk a.
“Kukis te chuan duhtawkin an abuse thei a, a chhan ber pawh mi 300 vel thihna thlentu a nih tlat vang a ni a, mahse, Meitei te chuan an abuse ve a rem lo tih te a sawi a. Heng ang chi te hi he leaked tape-ah hian ngaihthlak theihin a awm a, he tape hi judicial commission Justice Lamba kaihhruai hnenah kan thehlut tawh” tiin MLA te thuchhuah intawm chuan a tarlang bawk.
MLA rualte chuan Union government chu Kuki-Zo demand tihlawhtling tura chak zawka chet la tur leh a rang thei ang bera Manipur atanga Union Territory piantir turin an ngen bawk.
August 22, 2024 khan Churachandpur District Bar Association te chuan ‘Manipur Tape’ a Chief Minister thusawi hi duhlohna lantirin sit-in protest an huaihawt bawk a.
Kangpokpi District Bar Association te pawhin an thlawp thu an sawi bawk.