Manipur mipui aiawhten union home ministry hotute kawm

Manipur mipui aiawhten union home ministry hotute kawm
Manipur-a mipui pawl lian tak tak pathum aiawh mi 19-te chuan Thawhtanni khan Delhi-ah union home ministry hotute an kawm a. May, 2023 atanga hmarchhak state-a chi leh chi inkar buaina chin felna tura a tahtawl zela hun bi tiam neia kal dan tur an sawiho.
An inkawm zawha pawl pathum aiawhten thuchhuah intawm an siamah an ngaih pawimawh ber chu Manipur inpumkhatna a nih thu tar langin, “Kan thupui ber chu Manipuri tinte tana tha ber tur a ni,” an ti.
Delhi-a sorkar hotu lian dawrtute hi COCOMI, AMUCO leh FOCS aiawhte niin home ministry team-ah hian Adviser on Northeast Affairs AK Mishra, Intelligence Bureau Joint Director Rajesh Kamble leh hotu sangte an tel.
“Palaite hian a rang thei ang bera mi tin zalen taka an vei vel theih a tul hmasak thu thlen a ni a. Hei hi mi tin dikna chanvo leh sorkar pawhin dan anga a tih tur a nih piah lamah kan state-a muanna a awm leh theihna atana rahbi hmasa a ni,” tiin thu an chhuah.
Buaina a chhuah tirh atanga hlauh vanga an in leh lo chhuahsana baihvaia awmte an haw leh theihna turin sorkar laipui chu a tahtawla hun bi tiam neia chet lak dan tur ruahman turin an ngen.
Suspension of operation (SoO) inremna pawh sei pawh ‘state chhunga hemi kaihhnawihten tha taka an zawm leh an lungrualna a nih loh chuan’ an duh l tih an thlen a. SoO inremna hi Kuki hel pawlte leh sorkar laipui leh state sorkarin an ziah a ni a. He inremna hnuaiah hian helho hi an camp-ah awmin an ralthuamte kalh hnan tur an ni.
Manipur mipui aiawhte hian sorkar laipui chu an state-a dan lova lutte dap chhuaha um chhuah an nih theih nan National Register of Citizens (NRC) emaw, hemi tlukpui emaw kalpui thuai turin an ngen a. Manipur hi India leh Myanmar inrinaa awm niin hmun tam tak hi hung loh a ni.
Home ministry chu nakin lamah an state khawpui, Imphal-ah an state-a pawl pawimawh leh tel ve ngai mi dangte nen thutkhawm koh leh ni se tiin an thlen a. “Thutkhawm lehah chuan a kokim thei ang bera thil tiha kan state-a muanna leh nunphung pangngai a awm leh theih nana tel ve turte an tel ve vek kan duh a ni,” tiin an thuchhuahah an tar lang.
An state transport bus-a ‘Manipur’ tih inziak hliahtirna thleng pawh home ministry aiawhte hnenah hian sawi chhuakin he thil chhuina rei tak puan tawh loh pawh puan an duh thu an sawi a. Lo neitute an lova hna an thawh laia beih an ni thin pawh ngaihven an ngai tih an thlen bawk.
“MHA thuneitute hian Manipur aiawhte thil thlente hi an ngai pawimawh hle a, a tul angin a hmalatu turte hnenah thlenin chet lak zui dan tur pawh an ngaihduah dawn a. Inbiakna rah chhuah hi a lan thuai kan beisei a ni,” an ti.
Tar lan tawh thin angin hmarchhak state-ah hian Kuki leh Meitei inkarah buaina nasa tak a chhuak a. Mi 260 chuang thi awm tawhin mi 50,000 dawn baihvaiin an awm mek.

Get real time updates directly on you device, subscribe now.

Leave A Reply

This website uses cookies to improve your experience. We'll assume you're ok with this, but you can opt-out if you wish. Accept Read More