Maoist ruang 31 chhar

Maoist ruang 31 chhar
Chhattisgarh police chuan Thawhtanni khan Chhattisgarh-Telangana ramri, Karregutta tlangdung ramngawa ‘Operation Sankalp’ an thlaknaah Maoist nia an hriat ruang 31 an hmu chhuak tih an sawi.
Maoist-te hi engtika thah nge an nih erawh a hriat theih loh va. Bijapur Superintendent of Police Jitendra Yadav chuan beihpui an thlaknaa thil thlengte hi Nilaini hian Bijapur-ah a la puang dawn chauh a ni.
Police chuan Maoist hel pawl mi ruang 31 an hmuh zinga 20 chu tute nge an nih pawh an hria tih an sawi a, heng zinga 11 hi post-mortem examination tih zawh hnuah dan angin an chhungte hnenah an hlan tawh bawk tih an sawi.
“Ruang dangte pawh hi tih tur tulte tih a nih zawhah an chhungte theuh hnenah hlan leh a ni ang,” tiin Bijapur chuan an sawi.
April 3 khan Maoist hmeichhe pakhat chu beihpui thlaknaah hian thah alo ni tawh a, tun thlengin tu nge a nih erawh hriat a ni lo.
April 24 khan Maoist hmeichhe pathum kah hlum leh an ni a, an ralthuam, puak thei leh thil dang pawh laksak an ni.
“Bastar chhimthlang lama naxal laka beihpui kan thlakna hian rah tha tak a chhuah a. Venhim hna thawktute zawng zawng him vekin Bastar region him nan an bei zel a. Beihpui hi thlak mek zel la niin venhimna thil avangin hmalakna zawng zawng sawi a la rem lo va. A hunah thuneituten an la puang dawn a ni,” tiin police hotu akhat chuan a sawi.
Sawi danah chuan April 21 atanga beihpui thlak tanah hian sipai 28,000 chuang an thawk chhuak a, hmun 35 velah mi luhchhuah leh inkahna a thleng tawh.
“IED 400 chuang leh sipai 40 vel bakah puak thei thil tonne hnih vel kan man tawh a ni,” a ti bawk.
Tun tum beihpui thlak hi Bastar-a hel laka chetnaah chuan a la lian ber nia hriat niin sipai thawk chhuakte Chhattisgarh Police-a District Reserve Guard (DRG), Bastar Fighters, Special Task Force (STF), Central Reserve Police Force (CRPF) leh a tha bik, CoBRA unit an ni.
Thuneitute chuan thu an dawnah heng lai velah hian Maoist hruaitu lawk tak tak, Telangana state committee-a tel leh ralthuam nei tha, ‘battalion number 1’ an tih, Maoist sipai pawla a chak ber ber an awm niin an hria a ni.
Police chuan Karregutta hill range hi heng battalion tamna a ni a. Beihpui thlaknaah hian an hotu lian leh an mi eng emaw zat thah leh hliam an awm tawh niin an sawi.
Maoist tawmna leh an bunker tam tak tihchhiatsak an ni a. Puak thei thil, detonator, ei tur an inpekna leh ni tin an mamawh thil tam tak an mansak bawk.
Chhattisgarh-ah hian kuminah a hmain Maoist 168 thah an ni tawh a. An zinga 151 hi Bastar division an tih, district pasarih huam chhunga thah an ni.