Marquez kutah MotoGP title

Nimin, Pathianni Japan Grand Prix-ah chak zo lo mah se pahnihna nih kha MotoGP World Championship title lakna’n a tawk a, Spanish rider Marc Marquez chuan ni 2,184 hnuah bike intlansiak level sang ber title a neikir leh ta.
Kum 32 mi Ducati Lenovo rider hian Italian great Valentino Rossi champion zat a nihrual ve ta chiah a, race hmabak panga la awma title a lak fel hnuah Marquez chuan, “Thu hmanga sawi ngaihna pawh a awm lo. Ka hun tawn enjoy hi ka duh ber chu a ni mai, mahse, he title lak hi a harsa takzet a, tunah chuan ka hahdamin, ka thla a muang ta,” tiin mittui nen a sawi.
Marquez hi a Italian team-mate Francesco Bagnaia hnung chiahah thlengin, he race behchhana a point hmuh belh leh hmangin midang tan um phak ngaihna a awm tawh lo a, kum 2019 hnu lama a vawi khatna atan MotoGP title lawm tur a nei leh ta a ni.
Season kal laiah tum 11 chak tling tawhin, championship table-ah amah hnaihbertu, a nau ni bawk Alex Marquez nena an inthlauhna chuan point 201 a kai chho a, race vawi nga tlan tur la awmah Motegi tlankawnga parukna luahtu Alex hi chak vek pawh ni se a u hmakhalh ngaihna a awm tawh lo.
Kum 2016 atanga 2019 chhunga vawi li ngawt a champion zawn hnuah Marc Marquez hi hliamin a tibuai chho ta tlat a, chu’ng zingah chuan kum 2020-a a banruh a tihtliah kha telin, kum hnih chhungin vawi li tehreng zai a ngaih phah!
Hliam serious fu fu bakah tlankawnga na tak taka chetsual a nei zauh zauh a; kum 2023 khan kum 11 zet a lo vawn tawh Honda chhuahsanin Ducati lamah a insawn a, tun hi a nghakchhuak leh ta a ni.
2025 Japanese MotoGP-a lawmman semna dawhsan hniam ber luah thei tura pathumna kha Honda HRC Castrol driver Spaniard Joan Mir a ni.