Mbappe goal hnuhnungin PSG tlawm tur chhan zo lo

Mbappe goal hnuhnungin PSG tlawm tur chhan zo lo
Parc des Princes khelmuala Paris St-Germain game hnuhnungber chu champion thar nih lawmna hun atana serhhran ni mah se Pathianni zan inkhelah an mikhual Toulouse ngam loin mualneitu team an tlawm a, PSG home game a khelh hnuhnunberna tur ni taah Kylian Mbappe chuan goal khung mah se 3-1-in French champion thar an tlawm zui ta tho a ni.
Season kal lai tawp ruala Paris St-Germain chhuahsana Real Madrid pan tawh tur Mbappe hian minute riatna lekah mualneitu team goal hmahruai thun bawk mah se Toulouse lam hian chawlhlawk hmaa an siphurh an sut hman bakah second half chhungin goal hnih dang an khungbelh a, an kawtkaia tlawm chungin PSG-in Ligue 1 trophy an lawm a ngaih phah!
Tun season tawpa a contract neih lai zawh ruala PSG a chhuahsan tur thu kar liamta Zirtawpnia a nemngheh chian tak hnua a match khelh hmasakberah Mbappe hian French champion tana a thawhhlawkzia lantir nawn lehin goal hmahruai a thawh a, mahse, he goal khat bak hi Toulouse goalkeeper Arnau Tenas chuan a chhuah belh duh ta lo a; mikhual team tan Thijs Dallinga, Yann Gboho leh Frank Magri-te’n PSG goal-ah tilutin tun season-a an home game khelh tawpnaah Luis Enrique team an tlawm.
Europe media liante chuan France forward Mbappe hian Real Madrid-in kum nga daih tur contract a ziak dawn niin an tarlang hlawm a; Pathianni zan thleng khan kum 24 mi lek la ni chunga World Cup winner nihna rei leh tawh Mbappe hian PSG tan game 307 khelin goal 256 a thunsak tling tawh.
|um 12 ngawt French champion ni tling ta Paris St-Germain tan hian season kal lai inelna hrang hrangah game 47 khel tling tawhin, goal 44 a thun tawh bakah assist vawi 10 a siamchhuak tling tawh bawk.
A home match hnuhnungberah khan PSG supporter-te chuan Mbappe tan ‘banner’ lian pui an tarchhuak phe hlup hlup a; August 2017-a pound maktaduai 165.7 senga Monaco atanga an sengluh chu mawihnai takin home-ah an thlahliam phawt.
Enrique team hi Champions League semi-final khelh hnihah khan Borussia Dortmund lakah sikhat fai ve vein an tlawm a, khami hnu khan game thum tlawm tling tawhin, league kal laiah away fixture pahnih hmabak hlenchhuak turin Nice leh Metz an luhkhung ang a, May ni 25 khian French Cup final-ah Lyon an hmachhawn zui bawk ang.
Toulouse laka PSG tlawmna kha tun season league-a an chak loh vawihnihna chauh la niin, khelh 32 atangin point 70 an khawl tling tawh a, league game hnih chauh khelh tur awm tawhah point rukin anmahni hnaihbertu pahnihna AS Monaco nen an inthlau.