MBBA Season Opening 2025 A hmawrbawk ni…

MBBA Season Opening 2025
A hmawrbawk ni…
Mizoram Basketball Association (MBBA) calendar-a tun season-a inelna hmasa ber, season opening tournament chu June ni 3 atang khan khelh tan a ni a, vawiin June ni 14, Inrinni hian MBBA enkawl league pathumte’n a hmawrbawkna final an khel dawn.
Thlirletna
June ni 12 zan khan Mizoram Super League (MSL) club pariat zing atangin semi-final game hmasa zawkah Zarkawt BCA leh Chanmari BC-te’n game hautak zet an khel a, 60-56-in Chanmari BC-in Zarkawt BCA an barakhaih!
Season hmasaa inelna zawng zawnga champion vek Zarkawt BCA hian semi-final-ah Chanmari BC hi basket an neih hleih theih thlawt loh vanga ngam lovin an tlawm a, an record tha thaibo a ni!
BCA hi an head coach thar K-a hnuaiah hian an inchhuihthlu nghal!
Chanmari BC hi tun season-ah hian an club owner Tluangtea hovin thapui chhuahin an bazar a, head coach huaisen Vanlalnunsanga Ralte (Lana) chu Saron BC atangin thawm ri hak thama lalutin, star player Kanan tlangval Rozama pawh Zemabawk BC atangin an lakluh belh bakah player engemawzat huikhawmin, champion team din ngei tumin sum leh thluak an hmang – inelna an hmachhawn hmasak berah final an lut zui ta pang.
Chanmari BC hi Champmari tiin sawi theih ni tak maw?
Semi-final hnuhnung zawkah hian Zemabawk BC-in team tha an nih an phochhuak nawn a; squad kim lo deuh mah se coach fing Sangpuia enkawl hian Khatla TBL an ngam hle.
An boss Ricky-a uapna hnuaiah nomawi chawi ngei tumin tang thei viau mah se an star player Ropuia leh mi dangin 4th qtr. luhai an nei a, 65-68-in uiawm takin Khatla TBL lakah an tlawm!
MSL X ang bawkin semi-final-ah Khatla TBL hi vannei nawn lehin, H. Laldinsanga (Mapuia) kaihhruai Khatla TBL hian player lian an lakluh chhawrtangkai nghal mah se Mizoram basketball-ah hian Zarkawt BCA leh Khatla TBL ni hnuhnung a thleng mekin a lang – he team tha pahnih hi ngamtu leh chotu an lawr tan ta tlat!
Vawiina final khel turte:
1. Bungkawn LBA vs Mission Veng Hotshots (Women) – 2pm
2. Electric BC vs Vanguard BC (D League) – 5pm
3. Chanmari BC Vs Khatla TBL (MSL) – 7pm