MCS-in bana kaih ‘champion pui’ tum

Mizoram Civil Service Association chuan state sawrkar policy – Bana Kaih chu champion pui ngei tum an rel.
Zirtawpnia Mizoram Civil Service Association general conference vawi 48-na an hmannaah resolution an pass a. “The Mizoram Bana Kaih (Handholding) Scheme” chu tha an ti a, champion pui ngei turin mahni awmna hmun theuhah theihtawp chhuah nise, an ti. Mipui hnena essential service tha zawk pek a nih theih nan, District, Sub-Division leh Block-a hmasawnna ruhrel, tun aia tih changkan a nih theih nan sawrkarah thlen nise, an ti bawk.
Conference hmanpuitu chief minister Lalduhoma chuan Bana Kaih scheme hi ei leh bara hmasawnna mai ni loin, mipui moral thlenga siamthat tumna policy a ni, tiin, ngaihpawimawh hmasaa lo nei turin MCS officer-te chu a chah a. Sawrkar hnathawk pawl hrang hrangten an hmuh tawh atanga a hmuh danin, a hnuailam staff-ten ngaihthah an hlawha a hriat thu a sawi. “Kan thawhna hmun theuhah kan hnuai leh kan chunga midangte nena thawhhona tha tak siam hi officer tha awm dan tur a ni,” tiin, chu hmahruaitu ni turin a fuih.
Langtlang leh mitin huapzo rorelna chu civil service kalphung awmsa a ni tih Lalduhoma hian a sawi a. Sawrkar thar hian a ngaipawimawh thu leh technology hmanga chu’ng thil chu nasa zawka uar deuh deuh an tum tih a sawi.
MCSA president V Lalengmawia chuan sawrkar tharin convergence a uar chho dawn a, hei hi tunhma atanga tih theih thin loh, an nghahhlelh em em niin a sawi. “Kan awmna hmun theuhah sawrkar flagship programme – The Mizoram Ban Kaih (Handholding) Scheme’ tihlawhtlingtu ni turin theihtawp kan chhuah dawn nia,” tiin member-te a chah.
MCS inkhawmpuiah hian sawrkar flagship programme – ‘The Mizoram Bana Kaih (Handholding) Scheme’, New Criminal Laws leh office inrelbawlnaa hriat tur pawimawhte an zirho a ni.