Mediation: Kawlphetha kalphung tharin a nghawng

Lallunghnema
Charity Lodge
Cont: 9862288182

Consumer-te lungawi lohnate chu thawi dam (redress) a nih theih nan hman rua (mechanism) pakhat atan Mediation Cell din chungchang hi Consumer Protection Act 2019, Chapter V-na, Section 74 – 81 huam chhungah hian tarlan a ni a. The Consumer-Protection(Mediation) Rules 2020 pawh chu India ram chhunga hman theih tûrin peih a ni nghal bawk a ni. Tichuan, National, State leh District Commission tinah Mediation Cell din tura tih a ni a. Mizoramah pawh hian State Consumer Commission leh District Commission zawng zawngah Mediation Cell hi awm vek tur a tih a ni a.Ka hriat danin harsatna hrang hrang avangin Mizoram State leh District tam zawka Commission-ah te hian dah a la ni lova. Aizawl District-ah erawh chuan tunah hian Mediator pakhat dah a ni tawhin thu dawn a ni a. Mediator-te hi Consumer Commission President leh Member-te nen a tul ang angin an thawk ho dawn a ni.
Mediation Cell hi Consumer-te tan tangkai hle tura ngaih a ni bawk. Complaint ngaihtuah tak tak (hearing) nih hmain a ‘inkhingten’ (Complainant leh Opposite Party – te) an rem tih ve ve chuan Mediation Cell – ah hian ‘inrem siamna’ neih a, complaint pawh tihtawp mai tur a ni. Hetianga awlsam taka Consumer Complaint chinfel mai hi thil tha tak a ni a. A manhlâ hle a ni.
Mediation kalphung, dan leh pawi pang thenkhat erawh tun hnaiah ka sawi nual tawh kha. Tun tumah hian ka sawi dawn lo a ni. Kan sawi thin tawh angin Mizoram Consumer Commission kan neihte hi mipui hian kan hmelhriat that tawk loh avangin Mediation Cell pawh hi kan bawh lutuk rih lo niin a lang a. Consumer Commission-te pawh hian Complaint an ngah loh tlangpui niin a lang bawk. Engpawh nise, miin a thil lei leh service a hmanna a, a lungawi lo a nih chuan fiah ngam leh rintlak document a neih a ngai a. Consumer chuan lei leh hman duh tawk mai lovin, evidence a neih a ngai a ni. Chu evidence chu receipt emaw Cash memo emaw te hi a ni a. Heng hi kan neih ngei ngei a tul a ni.
Kan sawi thin angin kan hnena Consumer lo zualko thinte hian an thil leinaa cash memo/receipt an neih thin loh avangin um zui theih loh hi tam tak a awm a. Complaint loh nen thuhmun reng a ni. Chuvangin cash memo emaw, receipt emaw dil hi hreh reng reng loh tur a ni.
Tun hnaiah ka theih ang anga consumerism lama ka inhmannaah hian thil thar ka tawng zel a. Thil lawmawm leh lawmawm lo pawh a inchawh pawlh nuk mai! Runmawi Youtube Channel nena kan interview-na pawh 1K views a kai tawh a. Viewer pawh kan neih belh zel ka duhin ka beisei a. Consumer Awareness hmanraw tangkai tak a ni zel ang tih ka ring. He ka Column chhiartute hi Campaigner tha tak in ni thei dawn a. In lo view bakah mi dangte pawh lo view – tir ve ula, chhiartu tam, hretu tam hi hlawhtlinna kawng khat a ni. (View ka han ti ve chhên a..Keini Mizo ho hi Sap tawng ngaisang hnam kan ni bawk si a. Kan thang tharho lah hian ‘tawng tial’ hi an lawm phian a! Sap tawng ka han rawlh ve khang lang a nih hi-llh)
Kum 5 vel atang khan ‘Consumer – te chanvo hriatna’, tih channel ka siam ve e, ka ti a. Subscriber pawh an thahnem viau mai! Mahse harsatna hrang hrang avangin ka chawlhsan ta ringawt a. Tunah hian thlir tur a la awm a, episode sawm thelh ka dahin ka hria a. Consumer-te tana bengvâr thlâk tak tak leh tangkai tak ni pawhin ka hria a ni. Lo subscribe tur pawhin chhiartute ka ngen a che u. Theih ang anga thar thawh leh chhunzawm ka tum a ni
Tun lai tak hian Power & Electricity Department chuan Electric Bill Software – hmanga kalpui a tum avangin Consumer – ten nasa takin an buai phah a, an chiai nasa khawp mai a. Hetih lai hian MZERC beng pawh a thleng ta hial a. Hetiang avang hian Centre For Consumer Education chuan PR – te siamin MZERC Office – ah an hotute an len chilh bawk a. Mipui hrilh fiah hmasa lova, hetianga thil kalpui hi a tha lo hle tih chu Consumer- te ngaihdan a ni.
P&E hotute pawhin ram leh mipui tan tiin hma an la a ni a. Consumer-te hma khua a niin an tuarna nasa tak thleng thei a ni a. Chuvangin Power hotute pawh hian ngaihtuah tha leh se, a duhawm hle a. Kan that tlanna tur thil a nih avangin fel ber, tha ber lam hawi chu duhthusam a ni a. NZERC-te, P&E leh Consumer- te duh dan chu a nih tho hmel a. Kan thahnem ngaih dan a inkhuang rual lo a ni ber mai âwm e.
Tuna ruahmanna tharah hian fel fai leh tha mipuiin kan beisei a. Department lam pawhin an duh bawk a. Mahse, mipui phurrit zawnga kalpui anga ngaih theiha a awm hi a vanduaithlak hle mai! Sawrkar, chu chu Power & Electricity Department hian Software thar kawng a zawh dan hi ngaihtuah nawnin siam tha leh se, a lawmawm ngawt ang. Consumer tel lo chuan thil hi a kal tluang thei lo. Department pawhin awmzia a nei hek lo. A thlawna hmu kan ni lova, dawng kan ni hek lo tih hi Consumer-te au hla(slogan) a ni.