Mercedes EQS-in record siam

Autocar India leh Mercedes-Benz India te chuan Guinness World Records an siam a, electric car vawi khat chauh a battery charge a tlan thui thei ber record an siam a, Mercedes EQS 580 hmangin km 949 a thui an tlan. A hmaa hetiang record chu UK-ah Ford Mustang Mach E hmanga an siam niin, km 916.74 a thui an tlan thei a, Mercedes Benz EQS hian km 32.6-in a rawn khum ta a ni.
Record siam nan hian Bengaluru atanga Navi Mumbai thleng an tlan a, an tlan chhuah hmaa a battery an charge full bak chu a battery hi charge leh tawh miah lovin an tlan char char a, km 949 a thui an tlan thei a ni.
Autocar India chuan Made-in-India Mercedes EQS 580 sedan kher record siam nana an hmanna chhan sawiin, India-a electric vehicle hmuh theih zinga range nei sang bera chhal a nih vang leh a India-a car aerodynamic tha ber nia chhal a nih vang te niin an sawi a, a drag coefficient pawh 0.20 chauh a ni. EQS hi ARAI range km 857 a ni a, 107.8kWh battery a nei a, mahse, ARAI certified range hi 10% velin a khum ta a ni.
An zin kawngah hian a ni khatnaah km 515.2 tlanin, Belagavi-ah an tawp a, hetah hian a battery state-of-charge (SOC) 44% a ni. A ni hnihnaah a tawp lamah car ke a puncture, chumi tih loh chu harsatna liantham tawk lovin an tlan thei a. Car hi Autocar India-a an road-tester Rahul Kakar-a’n khalhin, Nani Mumbai an thlen dawn hnai, km 884 an tlan tawha SOC chu 3% chauh a ni tawh a, 1%-a a tlak hnuah pawh km 30 vel zet an la tlan leh thei a ni.