Messi tel lovin Argentina an chak

Nilaini zing lam khan South America khawmual atanga World Cup khel tur zawnna neih chhunzawm a ni a. World Champion Argentina chu an player pawimawh Lionel Messi tel lovin an chak. Inkhel dangah Brazil chuan si khat faiin Peru an hneh a, hma an hruai chhunzawm. Argentina leh Brazil an chak laiin Uruguay an tlawm ve thung.
World Champion Argentina hian Mimualah Bolivia an hmachhawn a, si thum faiin hnehna an chang. Estadio Hernando Siles-a an hmachhawn Bolivia lakah an khel tha viau a, an player pawimawh ber Lionel Messi hahdamtir bawk mah se goal thum an thun thei tho. Na taka an khingpuite nawr rengtu Argentina tan hian Enzo Fernández chuan minute 31-naah vanneihthal ang reng takin a pet goal a, hmahruaina goal a thun.
An mualah goal an chhuah hnu lawkin Bolivia an talbuai chhunzawm a, minute 39-naah Roberto Fernández hnawhchhuah a ni. Si phur zawk leh tlem zawk an nih vangin an talbuai leh zual a, goal an chhuah zui leh thuai. Minute 42-naah Nicolás Tagliafico chuan fing takin a tauh goal a, an goal hnihna a thun. Chawlhlawk hmain goal dang a luh belh thei tawh lova, Argentina hian si hnih faia hmahrua chungin chawlhlawk an hmang.
Chawlhlawk hnu lamah Argentina an khel tha chhunzawm a, goal erawh an thun har ta viau thung. Na taka an khingpuite nawr chunga goal an thun theih loh reng hnuin hun tawp dawn hnaih minute 83-naah Nicolás González chuan near post-ah fuh takin a pet goal a, an goal thumna a thun. Hun tawp thlengin goal dang a luh belh thei tawh lova, si thum faia hnehna changin Argentina chuan point thum an hmu ta a ni.
World Cup 2026 khel tur zawnnaah Argentina in bul an tan tha a, vawi hnih an chak zawn ta chiah. An elpui lian Brazil nen khelh hnih atangin point ruk ve ve hmu mah se goal thun tlem zawk Argentina hi pahnihnaah an awm rih.
Nilai zing vek khan World Cup-a champion ngun ber Brazil chuan Mimualah Peru an hmachhawn a, an chak zo lo teuh hle. Brazil hian game thunun bawk mah se goal an thun thei lo reng a, an hun tha an hlah fo. An hun tha an hlah tlut tlut hnuin minute 90-naah defender Marquinhos chuan an chakna goal a thun hram a, si khat faiin an chak zui ta a ni.
World Cup-a champion tawh team pahnih; Argentina leh Brazil te an chak laiin World Cup-a champion hmasa ber Uruguay erawh chu Ecuador hneh lovin an tlawm ve thung.
Uruguay hian Rodrigo Paz Delgado-a an hmachawn Ecuador lakah goal an thun hmasa zet naa, tlawm an pumpelh zo chuang lo. Minute 38-naah Urguay tan Agustín Canobbio goal thun chu minute 45-5-ah Félix Torres-a’n a sut a. Torres vek hian minute 61-naah an goal hnihna a thun zui leh a, an mikhual Uruguay lakah 2-1 in an chak zui ta a ni.
Nilai zinga inkhel dangah Chile leh an mikhual Colombia chu goal awm lovin an inhnehtawk.