Mexican Open ace tina sum pe tur Tsitsipas

Nikum October thlaa thlipui (Hurricane Otis)-in nasa taka Acapulco khawpui a nuaichhiat thuamthatlehna atan Stefanos Tsitsipas chuan sum a thawh dawn a, a pawisa thehchhuah dan tur erawh a dangdai deuh a, Mexican Open tennis tournament kal meka ace pakhat zelah US dollar 1000 a phawrh zel dawn.
Mexico ram Pacific tuifinriat kam nuai tawhtu hurricane zingah Otis thlipui kha la na bera chhinchhiah niin, a lo berah pawh hriat theih chinah mi 50-in nunna an chan a; Acapulco khawpui chuan a tuar na hle a, dollar vaibelchhe tamtak man bungrua a tichhia a, in chhia ringawt pawh 130,000 chuang awmin, thlipui avanga chhia dang a tam hle bawk.
Greek world number 12 hian Acapulco khaw tuamdam lehna program-ah tel ve a duh a, a sum thawhna hmanrua atan he khawpuia tournament lian Mexican Open khelh chhunga ace apianga US dollar sangkhat zel phawrh a nih thu a puang zui ta a ni.
Mexican Open hi February ni 26 atanga khelh tan niin, March ni 2 thleng a awh dawn a; player langsar inlan zingah German Alexander Zverev, Dane Holger Rune, Norwegian Casper Ruud leh American Frances Tiafoe an tel.