MFA U-17 League champion SYS

MFA Under 17 League 2025 final chu November 4, Thawhlehni khan RG Stadium-ah khelh a ni a. Inkhel hmuhnawm takah SYS chuan champion lai Aizawl FC chu 3-1 in an hneh a, phu takin an champion.
Final-a Aizawl FC leh SYS te intum hian ngaihven a hlawh a, an chetthat dun em vangin champion tur zawk rin thiam pawh a har hle. Beisei lawk ang ngeiin inkhel a hmuhnawm a, an inkhelh that chhawk. SYS in first half thununin goal hnih an thun a. Aizawl FC in second half thunun zawk mah se goal an thun thei lo thung. Hei hi an inkar tizau zualtu a ni.
Champion lai Aizawl FC hian final-ah bul an tan tha lova, penalty an chawi thuai. Inkhel tan atanga minute 6-na lekah penalty an hmuh chu SYS tan player hmuhnwm leh goal thun thei tak Benjamin Lallawmawma chuan chiang zetin a pet goal a, hmahruaina goal a thun.
Goal an chhuah hnuin Aizawl FC an talbuai a, ball an chang rei hlei thei lo. SYS in ngam takin an nawr a, goal thu theihna hun tha an hmu zawn. Uiawm takin an hun tha neih hloh bawk mah se fuh zetin AFC tlarhnung an thiat a, H Lalhriatrenga chuan minute 18-naa awlsam takin a pet goal a, an goal hnihna a thun zui leh. SYS hi chawlhlawk hmain goal li thun thei dinhmunah an ding naa an vannei reng bik lo. Si hnih an phurh reng hnuin Aizawl FC tan player hmuhnawm Francis Lalhruaizela chuan minute 45-naah mawi zetin a pet goal a, an si phurh a sut then.
Chawlhlawk hnu lamah Aizawl FC an insiamtha a, team thar hlak ang maia inlanin SYS an nawr tawm. AFC hian goal thun theihna hun tha an nei zawn a, an hun tha neih an chhawr tangkai thei lo. Game thunun tak chunga goal an thun mai theih loh vangin an chesual a, goal an chhuah belh ta zawk. SYS in fuh takin an khingpuite an nawr let thut a, Omega siamsak tha tak chu goal hmahruai thuntu Benjamin Lallawmawma chuan minute 79-naah awlsam takin goal-ah a chantir a, an hmahruaina a tizau. Aizawl FC hian an si phurh sut tum viau mah se hun tawp thlengin goal dang an thun belh thei tawh lova, SYS lakah tlawmin an trophy kawl mek an humhim zo ta lo a ni.
Inelna neih zawh takah SYS tan goal 16 zet thuntu Benjamin Lallawmawma chu top-scorer a ni a. Tlangnuam rawlthar, ball thiam leh hmuhnawm Ben-a hi ‘Best player’ ah thlan a ni bawk a, mimal lawmman hlu pahnih a dawng kawp.
November ni 4 zana khelh zawh tak MFA Under 17 League hi 2025 atanga khelh tan a ni a, champion hmasa ber chu Aizawl FC an ni. He inelna hi a hma chuan ‘MPL Under 17 League’ tih a ni thin a, MPL team ni lo ten inelna an hmachhawn tak vangin a hming thlak a ni. ‘MPL U 17 League’ a champion hnuhnung ber chu Aizawl FC hi an ni a. MFA Under 17 League-a champion hmasa ber an ni leh bawk.
Zin kawng harsa zawhtu SYS
Regional Sport Training Centre (RSTC), Saidan – Kolasib football Academy a awm mek Sporth & Youth Services (SYS) team hian MFA Under 17 League – 2025 ah zin kawng harsa tak an zawh. Point thum paihsak an nih bakah inelna hmachhawn zui thei lovin tla hman hial mah se kaihthawh leh an ni a, ropui takin an champion zui ta hial a ni.
SYS hi Group D-ah awmin an match hmasa berah Becks’ Academy chu 6-0 in an hneh nghal a. An match hnihnaah Kanan FC chu 5-0 ngawtin an sawp zui leh. Kanan FC an sawp hnu hian an player thenkhat hrem an ni a, SYS hi 3-0 in chak lova puan zui an ni. Hei bakah hian CMS fel lo vangin inelna hmachhawn zui thei lo turin team dang pariat nen tihtlak an ni zui leh bawk. CMS fel lo vanga team pariat ngawt tihtlak an ni a, quarter-final fixture siam a nih vek tawh hnuin inelna buatsaihtuten zahngaihna kawng an hawng a, team pariatte tinung lehin inelna a pangngaiin a kal zui leh. SYS hian quarter-final lut tura chak ngei ngei ngai chunga MSSC NRC hmachhawnin 5-0 in an chak zui leh hlauh a, quarter-final an lut hram.
Quarter-final atanga final thlengin champion phuin an inlan a, zin kawng harsa tak zawh zovin an champion a, trophy hlu tak an dawng zui ta a. Lungngai leh hreawm tuara an mittui tla chu lawm vanga mittui tlain a khahchhilh a, champion lawmna mittuiin a tleng fai zo ta a ni.