Mi pahnihin hming pelut

Lok Sabha inthlan lo awm tura candidate nih tum mi pahnihin Thawhlehni khan hming an pelut.
PC party candidate Rita Malsawmi leh independent ticket-a din tum Lalhriatrenga Chhangte te’n Thawhlehni khan nomination an file a ni.
Rita Malsawmi hian nomination a file zawhah PC party office-ah thu a sawi a, “Mizoram MP mai ni lovin Chhinlung chhuak Zofa leh India ram Kristian zawng zawngte tan MP ka ni dawn a ni,” a ti.
Mizoram hmasawnna tur te, Zofate himna tur te leh Hindutva do let tura nasa taka ke a pen theih nana tanlak a tum thu a sawi a, amah vote turin mipui a sawm.
Thlan tlin a nih chuan Aizawlah office a hawn dawn thu sawiin, “India ram pum MP zawng zawng pawhin an biala office an neih theuhna tur dan siam a nih theihnan Bill ka pu lut ang a, min pass pui ngei ka ring a. Mizoram mai ni lovin Indian history-ah Zofate zinga mi ngei hian bung thar tam tak kai pui ka tum dawn a ni,” a ti.
Independent ticket-a din tum Hriata Chhangte chuan ram leh hnam tana hnathawh a duh vanga MP inthlan lo awm tura din tum a nih thu The Aizawl Post a hrilh.
2019-ah pawh independent ticket-a a lo din tawh thu a sawi a, “Lok Sabha MP nih hi ka duh a, ram leh hnam tana thawh ka duh vang a ni. Chuvangin 2019-ah pawh ka lo ding tawh a. Congress party-ah ka lut a, hetah pawh hian Lok Sabha inthlana party candidate nih ka duh a, mahse a rem ta lo a. Chuvangin party atangin ka chhuak a, independent ticket-a din ka tum ta a ni,” a ti.
MP candidate nih tumin ZPM candidate Richard Vanlalhmangaiha’n kar hmasa lamah hming a lo pelut tawh a, Nilaini hian MNF candidate K Vanlalvena, Congress Lalbiakzama leh BJP candidate Vanlalhmuaka te’n hming an pelut ang. Nilaini thlengin hming hi pekluh theih a ni.