Mi sualin Nigeria khaw thum an rûnah mi tam tak that

Mi sualin Nigeria khaw thum an rûnah mi tam tak that
Lirthei ke hnih neia chuang silai kengten Nigeria khawthlang lama khaw pathum an luhchilh a, mi eng emaw zat an that.
AFP news agency-in Niger state-a tual chhunga mite sawi a tar lanah mi sualte hian mi an kap hlum a, thenkhat chu an hrawkah an zai hlum a, inhalin thenkhat, ‘an zat la hriat loh’ an ru bo bawk.
Inrinni tuka thil thlenna hmun hi thla hmasaa jihadist-ten mi 100 chuang an suatna bul lawka thleng a ni.
Mi sual, bandit tia an sawite hian kum tam tak chhung Nigeria-ah hian mi beih leh ruk bo an ching tawh a, a tun hnaiah khawthlang leh ram lailiah an ching thar zual hle.
Bandit-te hian Inrinni zing hma takah khan Tunga-Makeri khua an luhchilhnaah hian mi paruk an that niin Niger State police thupuangtu, Wasiu Abiodun chuan AFP a hrilh.
“In thenkhat an hal a, an zat la hriat chiah loh mi an ru bo bawk,” a ti.
Mi an thah tam berna chu a bul chiah khua, Konkoso-a chengte an ni a. In awm deuh zawng zawng halin hmeichhe pali ruk bo an ni bawk niin tual chhung miten AFP an hrilh.
Konkoso an beih hnuah hian bandit-te hian Pissa an pan leh a, police station halin mi pakhat an that niin thil thleng hmutuin a sawi.
Reuters chuan khaw pathuma thite hi mi 32 chuang nia tar langin AFP chuan 46 vel a ti thung a. Thil thleng chiang tak leh thi zat hi dik tak hriat theih a ni mai rih lo.
Venhim hna thawktute chuan bandit-te hi ‘lirthei ke hnih nei 41-a thawk chhuakin pahnih/pathum zel an chuang bawk’ tih AFP an hrilh.
Nigerian hruaitute hi tharum thawhna hmet mit tura nawrna an tawng nasa hle a, jihadist pawlte hi hmarthlangah tamin inlak hran tuma bei pawlte chhimchhakah an inkhuar bawk.
US chuan Krismas ni khan hmar lam, Sokoto-a Islamist hel hmunhmate a bei a, President Donald Trump-a chuan ‘Kristiante an thah zel chuan na zawkin a la bei dawn’ tih a sawi nghal.
Jihadist-ten an thah tam zawk hi Muslim an ni thin thung niin Nigeria-a tharum thawhna thleng thin thlithlaitu pawl chuan an sawi thung.