Mico observer-te inzirna hnuhnung

MLA inthlanpui vote chhiar tur inbuatsaihna kal zelah Champhai district-a Assembly bial pathuma vote tla chhiar huna vote chhiar enpui tura ruat, micro observer-te tan Ningani khan training tum hnihna leh a hnuhnung ber ni bawk buatsaih a ni.
Champhai district election officer James Lalrinchhana chuan micro observer-te chu vote chhiar kaihhnawihah kawng engkima observer aiawhtu leh Election Commission mit leh beng an ni, tiin, an mawhphurna chu tha taka an hlenchhuah theihnan uluk taka inzir turin a chah. Vote chhiar nia micro observer-te mawhphurhna hrang hrang, EVM-a vote tla chhiar dan inzirtirnate neihpui an ni.
Micro observer-te hi vote chhiar lai ngun taka en thlithlaitu niin, observer-te thachhang dawltu an ni a. Counting Hall-ah vote tla zat uluk taka lo en a, form siamsa hmanga observer hnena report petu an ni. Postal ballot chhiarna leh EVM-a vote tla chhiarna dawhkan tinah micro observer pakhat zel an duty dawn a, observer tinte bulah anmahni puitu tur micro observer pahnih ruat an ni bawk.
Champhai district-a micro observer atan hian mi 36 ruat an ni a, sawrkar laipui kaihhnawih hna chelhte an ni.
Champhai district-a vote chhiar endiktu tur observer-te hi ECI chuan a ruat tawh a. Champhai North AC-ah Dr Ranjit Kumar Singh, Champhai South AC-ah Krishna Kumar Rawat leh East Tuipui AC-ah Sanjay Kumar te an ni.
Kolasib district-a assembly bial pathum – Tuirial, Kolasib leh Serlui biala micro observer-te tan pawh Ningani vek khan training vawi hnihna buatsaih a ni a. District election officer John LT Sanga’n hmanpuiiin, micro observer atana ruatte chu an mawhphurhna tha taka hlen turin a chah.