Midang tana a nunna hlantu naupang hnenah award hlan

India sawrkarin mi huaisen chawimawi tlakte a hlan thin zing ami, Sarvottam Jeevan Raksha Padak 2023 chu Anthony Vanmawia (11), Tuirial Tlangveng hnenah mahni nunna hlana a nau tui tla a chhanchhuah avangin pek a ni a. He chawimawina hi Zirtawpni khan a chhungte hnenah Aizawl bawrhsap Er. Lalhriatpuia chuan a hlan.
Anthony Vanmawia te unau hi 2023 April 17 khan tlaia an school bang chu khawlum lutuk avangin tuia inchiah dai turin luiah an kal a. Tuirial lui, Pachuau Li ah a nau Lalhmunsiama chu a chesual ta a. Anthony Vanmawia hian theihtawp chhuahin a nau hi a chhanchhuak a, vanduaithlak takin a nunna a chan phah thung.
Kumin Republic Day-a chawimawina hrang hrang dawng tur an puan zingah Sarvottam Jeevan Raksha Padak awardee mi pathum an awm a. Anthony Vanmawia bakah hian Mizoram atang thoin Melody Lalremruati a tel. He chawimawina hi mahni nun thapa midang nunna chhantute hnena hlan thin a ni.
Award hian medal leh chawimawina thuziak bakah sumfai cheng nuai hnih a keng a. Sum hi direct-in Home department-in award dawngtute bank account-ah a thunsak thin. Award hi Anthony-a pu PC Ngursiamliana leh a pi Lalrinpuii ten an dawng a. Tuirial Tlangveng VC leh YMA hruaituen tawiawmin CYMA leh MJA aiawh an tel bawk.
Sarvottam Jeevan Raksha Padak dawng ve tho Melody Lalremruati (17) hi Khawhnai, Mamit district ami a ni. 2021 October 14 khan Damparengpui leh West Phaileng inkar, Sunhlu luiah chhungkua in an kal a, a nau kum 7 mi chu tuiah hian a tla a, Melody leh a nu in chhanchhuah tumin an bei nghal a, a nau hi an chhan thei mah se, anmahni hi tuiah an talbuai zui ta a ni. A nau hian kawnga lirthei sila awm a pu a va ko a, a nu hi chhan hmangin Melody erawh an chhan hman ta lo a ni.