MIGAAHSSLA-in sawrkar school-a hlankai nih an lawm

Mizoram Govt. Adhoc Aided Higher Secondary School Lecturers’ Association (MIGAAHSSLA) buatsaihin higher secondary school provincialised a nih chu Thawhlehni khan lawm a ni.
He hun hmanpuitu School Education director Lalsangliana chuan Mizoram sawrkarin middle school, high school leh higher secondary school, an vaiin school 180 sawrkar sikula hlangkai tura ngaihtuahna a sen hian hrileng kaihhnawiha sum harsatna karah thutlukna hautak leh harsa ber a siam tih a sawi a. School dinhmun chawikan chu hna hautak, ngaihtuahna ril tak senga thawh a ni tih a sawi. School 180-a thawk mi 1422 te, sawrkar hnathawk ni ngai reng reng lo te chu sawrkar hnathawkah sengluh an ni ta, tiin a sawi bawk.
“School dinhmun chawikan hian zirna tha siam kawngah rah tha tak a a chhuah ka beisei a. Board Exam-ah pawh result tha a hrin chhuah beisei ang,” a ti a. Thingtlanga thawk lecturer-te khawpuia insawn dil lo tura chahin, “Thingtlang zirlaite hian lehkha thiam hi an chanvo a ni a, chumi pek chu zirtirtute mawhphurh a ni a, kan thawhna theuha nghet ang u,” a ti.
Provincialised lawmnaah hian an member thi ta te sunna hun an hmang a. HSS principal-te provincialise avanga an dinhmun kiantute chawimawi an ni bawk.
Tunhnaia Mizoram sawrkarin adhoc aided higher secondary school 12 provincialise dinhmuna a hlankaite hi – Public HSS Ramhlun Venglai, Durtlang, Darlawn, Zohmun, Ngopa, Cherhlun, Thingsai, Khawzawl, Biate, Kawnpui, N Vanlaiphai leh Thenzawl HSS an ni a, heng school-ah hian lecturer 170 an awm a ni.