Spanish Maria Branyas Morera chu Guinness World Records-in khawvela mihring damlai zinga upa berah an puang a, an puan lai hian Maria hi kum 115 leh ni 321 a upa a ni a, hetiang kum zat ni tawh mah se Twitter lamah a la active peih hle tho a, a Twitter bio-ah chuan, “Ka upa, upa tawh tak ka ni, mahse ka mawl lo,” a ti thlap a, he social media platform-ah hian a tawn hriat atanga thufing te a la au chhuahpui peih hle a ni.
-- Advertisement --
Hmanni lawkah Guinness World Record-in upa bera an puan French nu, Lucile Randon, aka Sister Andre chu kum 118 mi niin a thi a, Maria Branyas Morera hian upa ber title hi a kawl ve ta a ni.
Maria hi Spanish a ni nain, 1907 khan San Francisco-ah a piang a, a nu leh pate hi Spain atanga US-a pem an ni. Mahse, kum riat a tlinin Spain-ah an kir pui leh ta a, vawiin thlengin Catalonia hmarchhak lamah hian an khawsa zui ta a ni.
Maria hi a kum a tam tak deuh hnuah Residència Santa María del Tura nursing home-ah a awm a, he home-ah hian kum 22 a khawsa tawh a, a awmna home chuan thuchhuah siamin a hriselna a la that thu an sawi.
Maria hi a pasal Dr. Joan Moret-a’n a thihsan tawh a, fa pathum neiin, tunah hian thu 11 leh tuchhuan 13 a nei tawh a ni.
Maria hian kumin kumthar ni khan Twitter-ah, “Tu tan pawh nunna hian chatuan a daih thei lo…Ka kum angah tawh hi chuan kumthar hi thilpek a ni a, hlim taka lawm a, bungthar kaiin, zin kawng duhawm tak leh hlimna nen. Hlim takin nun i hmang tlang ang u,” tiin a tweet a ni.