Mim Kut

Social welfare & tribal affairs changtu minister hovin nimin khan Mim Kut hman dan tur rel a ni a, tun thla September ni 29 hian Vanapa hall-ah hman tur a ni a, Kristianna mil leh inhnerem zawnga hman tur a ni awm e. Mim Kut hman nan hian ministry of tribal affairs atangin cheng nuai 20 hmuh a ni.
Mizo pi puten Kut an lo hman thin zingah Chapchar Kut leh Pawl Kut chu tun thlengin urhsun takin hman a ni thin a, Mim Kut erawh hi chu pawl thenkhat leh thianzaho tu tu te emawin an hmang ve thin tih loh chu, a state pum huap anga hman a ni ngai lova, tun tum hi a vawikhatna tur a ni. A bul tan that hi a zatve zo tluk a ni, tih ang khan, tuna Mim Kut hman tur hi uluk a pawimawh hle dawn a ni.
Kristian kan nih hmaa kan pi leh pute lo chin thin dan kha, kristian kan nih hnuah chhunzawm zel rem lo tam tak a awm a, chu chuan nasa takin hnam tih dan leh kalphung tam tak a chhilh bo mek a. Pi leh pu ten Kut an hman apianga a lailum luahtu lian ber ‘Zu’ chu kriatianna a lo luh hnuah ‘sual lian tak’ anga ngaih a nih avangin Kut hmannaah leklam a ni ngai ta lo va. Chapchar Kut kan hman dan pawh ‘concert’ chi khat a ni deuh tawh mai a; tunhmaa pi leh puten Chapchar Kut an lo hman thin dan hlimthla lantirna aiin thusawi, zaithiam leh a behbawm eng eng emawin Kut hman chhung a luah hnem zawk a. Pawl Kut lah chuti deuh tho chu.
Zu hi leklam a remchang tawh lo a nih pawhin, hmanlaia kan pi leh pu ten Kut an lo hman dan hlimthla thangthar ten an chhawm nun zel theih tura kalpui hram hram hi a pawimawh a. Zu aiah thei tui eng emaw hmangin Kut hlimthla dik tak hi a la hman theih a ni.
Chutiang bawkin, Mim Kut pawh kan hriat angin mitthi pual kut a ni a, hlimhlawpna lam hawia hman chiam a rem lo. Zu tel lo pawhin, pi leh pu ten Mim Kut an lo hman dan angin urhsun takin a la hman theih a, tunlai rimawi nena rik bung bung hun a ni lo. A hlimhlawp zawng hlira kaih her kan tum chuan, kan hnam ziarang eng ber nge tih hre lovin, tun atanga chhuan hnih thum lo awm turah hi chuan thangtharten hnam dang tih dan lain hnam ziarang chhilh bo vek khawpin Kut te hi an la rawn hmang ang tih hlauhawm tak a ni.