Mimualah England an chak

Thawhleh zana friendly match-ah England chuan Hampden Park-a an khingpui Scotland chu 3-1 in an hneh. England tan Jude Bellingham a khel tha viau a, Real Madrid midfielder Bellingham hian goal khat a thun bakah assist a nei bawk.
Hampden Park-a lenglut England hi an elpui kum hlun Scotland lakah bul an tan tha a, inkhel hmuhnawm tak an lantir. Scotland lakah khel tha viau mah se goal thun turin darkar chanve an ngah tlin a ngai tho thung. Minute 32-naah Walker siamsak atangin Phil Foden chuan hmahruaina goal a thun. Hmahruaina goal an thun hnu lawkah Three Lions hian goal dang an thun belh leh thuai thung. Minute 35-naah Real Madrid tana khel tha tak Jude Jude Bellingham chuan an goal hnihna a thun a, si hnih faia hmahruai chungin chawlhlawk an hmang.
Chawlhlawk hnu lamah Scotland in goal thun ngei tumin tan an khawh a, goal an thawkchhuak ta nge nge. Minute 67-naah Bench atanga lut Harry Maguire chuan an lamah a ti-goal a, Scotland si phurh a sut thensak. Duh khawp a hlawh loh sa nak laia an lamah a tih goal leh zel vangin Maguire hian sawisel a hlawh zui hle. Sawisel hlawh viau mah se manager Gareth Southgate erawh chuan an defender Maguire thlavang hi hauhin, a tan ve tlat thung.
Maguire-a’n an lama a tih-goal hnu hian hun tawp dawn hnaih minute 81-naah Harry Kane chuan England goal thumna thunin, an hmahruaina a tizau nawn leh a. Minualah 3-1 in Scotland an hneh zui ta a ni.
Scotland hian thawh leh zan khan thu lawmawm loh lam pahnih an hriat rual a ngai. An mualah England hneh lova an tlawm vangin hun duhawm lo tak an tawng a. Euro 2024 khel tur zawnna lamah Norway an chak vangin Euro khel turin Scotland hi an la tling chiang bik lo bawk. Norway hi chak zo Scotland hi tling chiang nghal mai tur an ni a. Georgia lakah an chak ve leh khut si vangin Scotland tlin hun tur an tihkhawmuansak.