Minister hoin ADC mamawh sawi

Minister hoin ADC mamawh sawi
Minister Robert Romawia Royte chuan District Council & Minority Affairs a chan hnua a hmasa ber ni turin Autonomous District Council pathum – Mara ADC, Chakma ADC & Lai ADC chief executive members, executive members, executive secretaries bakah Siaha & Lawngtlai district bawrsap, DC& MA departments hotute chuan a vawikhatna atan an thukhawm.
Minister chuan ADC pathum hamthatna tur ngaihtuahin Sixth Schedule area-a awm an nih anga an hamthatna leh chanvo turte department leh state sawrkarin ngaihtuahsak a pawimawh tih a sawi a. Lungrualna leh thawhhona tha nei zel turin a sawm.
ADC pathum hnena state-in budget atanga hlawh a pek bak hmasawnna hna thawhna tur sum a awm loh avangin infrastructure development hnathawhna tur project siamin a theih ang anga sum zawn nise, tia DC&MA minister-in rawtna a siam chu sawi ho a ni a. ADC-ten harsatna hrang hrang an neih, gazetted officer hmun ruak hnawhkhah leh thildang pawimawh pawh sawi a ni.
ADC-ten mahni inrelbawlna leh state sawrkar inkara harsatna an neih an sawi chu a theih anga chinfel pui a tum thu minister hian a sawi a ni.
CEM pathum chuan DC&MA minister kaihhruaia an la neih ngai loh meeting an neih avangin lawmthu an sawi a. LADC CEM V Zirsanga chuan hnathawktu lak chungchangah Group C & D-a harsatna an tawh loh laia Group ‘B’ chunglam hnathawktu lakah harsatna an tawh thu a sawi a. CADC CEM RM Chakma chuan Group A & B officer-ten eng vang pawha an hna an chawlhsanin an hmunruak hnawhkhat tura harsatna an tawh thu te, ADC hnuaia thawktu nihna inangte chu hlawhah pawh inang tlang se tha a tih thu a sawi a ni.