Minister-in vohbikte tana siam training centre tlawh

Minister-in vohbikte tana
siam training centre tlawh
Tanhril Aizawla pianphunga rualbanlo (specially-abled persons) tana training buatsaih leh he Centre-a State Braille Press chu Nilaini khan Social Welfare, Women & Child Development minister Lalrinpuii’n a tlawh.
Specially-Abled Training Centre Tanhrilah hian mitdel hawrawp print theihna khawl, State Braille Press bun a ni a, mitdelte hman tur zirlaibu, ballot paper leh thil dang print thin niin, tunah hian class 9-12 zirlaibu print mek a ni. Ram dang pan buai ngai tawh loin mimal leh sawrkar tan dawr theih reng an ni.
He Training Centre hi kum 1981 khan ‘Handicapped Training Centre’ tiin Laipuitlangah din a ni a, kum 2017 khan Training Centre for Specially-Abled Persons tia hming thlak a ni. Kumin April khan Tanhril-ah sawn a ni a. Puanthui zirna seat 30 awmin, thla 8 chhung training neihpui thin an ni.
Training Centre hi a hmuna riahchilh theih (residential) niin, riahchilh loa kalte chu an training chhungin thlatin stipend Rs.700 pek thin an ni a, training an zawh hnuin puanthuina khawl leh khawl dang an mamawh pek thin an ni bawk.
Tun dinhmunah Mizoramah specially-abled tan hian Training Centre hmun 4 – Tanhril, Thakthing Dam Veng, Chaltlang leh Lungleiah din a ni tawh a, heng centre-ah hian trade hrang hrang zir theihin, Training Centre atang hian mi 1992 vel zir chhuak an awm tawh a ni.
Social Welfare department hmasawnna atan leh thawktu indaih lohna phuhru turin district social welfare officer (DSWO) pahnih leh field facilitator (FF) post 3 lak thar tur buaipui mek a ni bawk.