Minister leh MLA-ten UNNATI zir
India hmarchhak state chawikanna leh thil siamchhuah lama hma latute tih hmasawnna tur, ‘Uttar Poorva Transformative Industrialization Scheme – UNNATI 2024’ chu Commerce & Industries department bultumin minister leh MLA-te tan Ningani khan Aizawlah zirho a ni.
Hmanpuitu Assembly speaker Lalbiakzama chuan sawrkar laipuiin hmarchhak state tih hmasawnna tura UNNATI Scheme 2024 a duan, hmang tangkaitu nih tum turin a chah a. Mizoram hmasawnna atana he scheme hmang tangkai tur hian legislature-ten he scheme hi an zir a, an hmelhriat that a pawimawh tih a sawi.
UNNATI Scheme North Eastern Region State nodal officer Dr Karampaul Singh leh he scheme nodal agency – NEDFi branch manager Lalhruaizela Fanai ten UNNATI thil tum leh hemi hnuaia hmalakna kalpui dan tur an sawifiah a. RAMP Project Mizoram state lead project manager Mark Lalduhsaka chuan MSME – RAMP chungchang a sawizau a; zawhna awmte chhan a ni.
UNNATI Scheme 2024 hi kumin March 9 khan tlangzarh a ni a. 2034 March 8 thleng kalpui tura ruahman a ni. He scheme kaltlanga hamthatna dil tumte tan UNNATI portal-ah 2026 March 31 ralhmaa inziahluh tur a ni a, he scheme kalpuina tur hian sawrkar laipui chuan cheng vaibelchhe 10037 a ruahman a, Mizoram tan cheng vbch. 453 ruahman a ni.
UNNATI scheme hnuaia hamthatna dil theih service sector-te chu tourism & hospitality services, promotion of film tourism, ropeway, entertainment parks and rides, heritage property restoration services a ni. Mizoram hi Zone B-a dah a nih angin hamthatna, capital investment incentives hnuaiah plants & machineries-a senso atanga zaa 50 dil thei a ni tih tarlan a ni.
Minister leh MLA-ten UNNATI zir
Get real time updates directly on you device, subscribe now.
Next Post