Mipui ngaih dan lak leh a behbawm…

School Education Department chuan school tan hun (timing), school calendar leh common school uniform chungchangah thla thar July ni 7 khian Public Consultation Meeting a buatsaih dawn a. Hemi chungchanga ngaih dan leh thurawn thawh duhte chuan meeting neih hmain an ngaihdan te ziaka theh luh theih a ni, tiin nimin khan mipui hriattirna an tichhuak a.
Hetianga mipuite tana ngaih dan thawhna hun remchang sawrkarin a buatsaih thin hi thil tha tak, mipui rorelna (democracy) lungphum tihhlawhtlinna zel a ni a. Hei hian ram leh hnam inrelbawlna chungchangah thuk zawk leh zau zawka hun leh tha thawh ve duhna leh tel ve chakna mipuiin an neih theih phahna tur a nih avangin a pawimawh em em a ni. Thufingin, harsatna hmachhawn kawngah mi pakhatin a hmachhawn ai chuan mi pahnihin an hmachhawn hian harsatna sutkian a awlsam zawk nge nge a ni (two heads are better than one) a lo tih angin, ngaihdan hriat zau hi thil tha tak a ni.
Kan hriat angin, sawrkar laipui lam pawhin dan thar an siam dawnin emaw, dan awmsa tihdanglam (amend) emaw an tumin, mipui ngaihdan (feedback & comments) theh luh theihna hun zau takin an hawng thin a. Kumin kum tir lama Advocates (Amendment) Bill, 2025 (Advocates Acts,1961 thlakna tur) put luh a nih dawn pawh khan, mipui ngaih dan lakkhawm nan hun thawl tak an hawng a, Draft Bill pawh a duh duhin internet kaltlanga an lo chhiar theih turin chhawpchhuah a ni nghe nghe.
Tuna school education-in mipui ngaih dan lakkhawm a tumna hi school timing, school calender leh common uniform chungchang a ni a, hei hi chu kan hriat tlanglawn sa deuh a ni a, school education lam hian heng thil pathum kalpui mek a nih dan hi mipui hmuh theih turin an rawn chhawp chhuak hran lo niin a lang. Duhthusamah chuan, ngaihtuah tur point pathumte tuna kalpui mek a nih dan hi mipui hnenah chhawp chhuak tel thei nghe nghe se a tha hle awm e.
Mizoram mipuite pawh, ram leh hnam inrelbawlna chungchang ngaihven kawngah tunah chuan kan thangharh chho ve ta viau a. Tunhmaa election laia polling booth pan mek lai pawha ‘tunge ka vote ang aw’ la ti mai mai thin khan, tunah chuan mahni in chhung lum atangin ngaih dan nghet (rigid) tak kan chhuahpui nalh nalh ta. Sawrkar inrelbawlna dik leh fel kan duh a nih chuan, a theih chin chinah a chhungah kan luhchilhin rilru pawh kan seng ve thin tur a ni awm e. Chuti ni lova, mi ngaih dan leh duh dana innghat kual mai mai kan nih chuan, hruaitu tha leh sawrkar tha hi kan nei thei ngai dawn lo a ni. Chutih laiin, political party zawm kher hi emaw politic kan tih tlatna rilru kha kan mausam a hun ve tawh. Political party-a inziak lut kher lo pawhin politic hi mahni in lum atangin duhtawkin a khelh theih a ni.