Miss Japan in lallukhum kalsan

Ukraine a piang Miss Japan chuan pasal neilai mipa nena an inkawp tih a tlangthan hnuah a lallukhum a rauhsan.
Kum 26 a upa Karolina Shiino chu kar hnih kalta khan Miss Japan lal lukhum khumtir a ni a, Miss Japan a thlan a nihna ringawtah pawh sawi a tam hle a.
Mi tam tak te chuan Japan khua leh tui a nia engmah sawiselna tur a awm lo an tih laiin thenkhat thung chuan traditional Japanese beauty ideals a awh zo lo an ti ve thung.
A hnu lawkah local magazine chuan a ngaihzawng neih chungchang a chhuah ta a ni. Shukan Bunshun a article ah Shiino chu infuluencer leh doctor kawplai nei nena inkawp a ti a. A kawpa sawi mipa erawhin engmah sawi a la nei lo thung a.
A tirah chuan pageant organiser te chuan Shiino chu chhanin a ngaihzawng chu nupui neilai a ni tih a hriat loh vang an ti a. Mahse, Thawhtan khan organisers te chuan Shiino chu inpuangin kawplai nei a ni tih hre reng chungin an inkawp a tih thu an sawi leh ta a ni.
Shiino chu ngaihdam dilna siamin chumai bakah Miss Japan nihna lallukhum chu a kiansan ta a ni tiin Miss Japan Association te chuan an sawi. Shiino chuan a fans te mai bakah mipui nawlpui hnenah pawh ngaihdam dilna siamin magazine report avanga hlauhna leh a talbuai avanga thudik lo sawi a nih thu a sawi a.
“Min thlawptute phatsana harsatna nasa tak ka siam avangin pawi ka ti a, ngaihdam ka dil a ni” tiin a sawi.
Miss Japan title chu runner-up awm nual mahse kumin chhung chuan tumahin an luah dawn lo thung a.
Compeittion neihnaah 22 January khan Miss Shiino chu lallukhum khumtir niin European thlah Miss Japan nihna nei thei hmasa ber a ni a. Ukraine a piang niin kum nga mi lek a nihin Japan-ah a nu nen an pem a, a pahrawhn hming a chhawm zui ta bawk a ni.
Japanese tawng ziak leh chhiar thiam tak niin kum 2022 khan Japan khua leh tui nihna pawh pek a lo ni tawh bawk a. Miss Japan lallukhum a khum hnua a thusawi hmasak berah pawh, “Japanese angin tum tam tak pawm ka ni lo thin a, mahse vawiinah chuan Japanese a pawm ka ni ta a, ka lawm a ni” tiin a sawi.