Miss Mizoram Serchhip – Vanlaltanpuii

Miss Mizoram thlannaa Serchhip district aiawh turin Vanlaltanpuii, kum 24, Serchhip Bazar chu Miss Mizoram Serchhip-ah thlan a nih chu nizan hmasa khan Serchhip District Bawrhsap Paul L. Kuma’n a puang. District Miss puanna hi Serchhip Press Club-ah neih a ni a, Bawrhsap chuan Miss Vanlaltanpuii chu inbuatsaihna hun a la neih chhunga theihtawp chhuah tura chahin, mite hmelhriat a nih dawn tak avangin naupang zawkte tan pawha a nun uluk turin a chah a, sang tak thleng turin duhsakna a hlan bawk.
Miss Vanlaltanpuii pawhin Serchhip District aiawh tura thlan a nihna leh amah buaipuitu zawng zawngte chungah lawmthu sawiin, theihtawp a chhuah tur thu a sawi. Miss Vanlaltanpuii hi Miss Mizoram 2026-ah audition-a inlan ngai lovin, final round-ah a tling nghal a ni.
Miss Mizoram Serchhip Vanlaltanpuii hi LP Sanglura leh Lalremruati te fanu niin, Serchhip Bazar Veng a cheng an ni a, feet 5 leh inches 7 a sang niin, Higher & Technical Institute – Mizoram (HATIM), Lunglei-ah Bachelor of Social Work (BSW) zo tawhin, tunah hian Serchhip District Child Protection Unit hnuaia Child Helpline Unit-ah a thawk mek a ni.