MISUAL NIH NGAWT LOH CHUAN FOREST CONSERVATION DAN PALZUT CHI A NI LO

Ruatfela Nu

Thuhma: Forest Department-a thawk pension tawh leh thawk mek zingah hian tunge humhalh ram chhunga thing kit thin a, tunge saw mill nei a, tunge sa kap thin a, tunge hlawh phu loa innei tha/lian tihte hi thil hriat har tak a ni lem lo. Hetianga Forest dan leh hrai leh a thawktute kan bih kan bih takah chuan, Mizorama Political Party pathuma atanga sawrkar insiam chhawk tawhte leh siam mekte hian, Forest Department hi an hmu mawh viau zel mai tih ka hmu chhuak tel luau a. Khaw dang Sial ang maiin an hnuaia mi Department tho chu ki nei sei zawk a ni tih hriain sik tumin an melh no lo viau zel a ni. Sawrkar apiangin ‘Forest/Ramngaw’ duh loh ngawt thu a awm lo a, Department dang ang bawkin a chhungah eiruk ching leh ching lo an awm a, a thawktute lah Department dang ang bawka an hnuaia thawk, an policy tihhlawhtling tur leh dan awmsa kengkawhtu tur an ni si a, sawrkarna an siam rual ruala an hmu mawh nghal ngawt zel hi thil mak tak a ni. Eng nge a chhan? Forest Department dan kenkawh, ‘Forest dan leh hrai hi an huat zawk chu a ni’ tih ka hmu chhuak.
Forest department hotute beng chhu-ngawng turin an ti thin: Hmasawnna hna (Project) lian tham ruahman a nih a, sawrkar pawmpuina (approval) lak a nih dawn lai hian, Chief Minister hovin Project neitu Department Minister leh Officer-te bakah a kaihhnawih Department hrang hrang Officer te chu Project sawi hova pawmpui turin an meeting a ngai thin a. Forest Department Officer-te phei chu ‘Environmental/Forest Clearance’ (EC/FC) tel lo va hmasawnna hna thawh theih a nih loh avangin a serh zinga a mei ang maia tel ngei ngei ngai an ni. Chutiang meeting-ah chuan Chief Minister/ Minister te’n Forest hotute chu an beng lo chhu-ngawng turin an ti thin zuk nia! Chumi chianna chu: Serlui HEP, Chalfilh Tourist Destination, National Institute of Technology (NIT) Lengpui, Zobawk Sport Complex ah te kan hmu a nih hi. Heng Project te hi FC/EC dil/neih loh vanga thuanawp mek leh thiah hial te an ni. “In beng lo chhu-ngawng mai r’u” an tih loh khiah chuan anmahni Politician leh Official lam zawkin hmasawnna hnathawh hmain FC/EC dil ngei ngei a ngai tih haider luiin an mit an chhing tlat thung. FC/EC hi palzut theih emaw an ti erawh a mawl thlak lua a ni; namnul tum eng ang mahse a theih loh; namnul tum avangin Project tam tak a tawl phah a, Serlui HEP pawh tun thlengin hawn (commission) loh a la nih hi.
Kan ram hruaitute’n Forest dan leh hrai hnawk an ti hi a awm a, PM Modi telin mi State te pawhin hnawk an ti ve tho a, NIT kan hmuh ruala hmu ve State dangin NIT campus ropui tak tak an neihna thangkhat lian a nih tawh laiin, keini State ve chu Forest Conservation Act 1980 (FCA) leh Environment Protection Act, 1986 (EPA) palzut a FC/EC an dil hmasak loh avangin, Private Building hrang hrang luahin NIT zirlai leh zirtirtute an la inzui kawi duah duah a nih hi. Mawl hi a pawi a, mawl bawka sual tel bawka dan mausam hi a pawi lehzual!
Kan hriat tel tur pakhat chu – Mizoramah Tlawng RRF paltlangin Rel kawng thui tak sial a ni tawh a, Railway Authority te hian hna an tan hmaa FC an lak fel thin avangin harsatna an tawk ve ngai lo tih hi a ni.
CM ni lai Pu Lalduhoma pawhin Forest dan hi hnawk a ti ve tho: Kan CM ni mek hian CM kal tate ang thovin Environment leh Development hi inhnerem taka kal dun rial rial thei a ni tih a hmu fiah thei lo, Forest dan leh hrai hnawk a ti a: “Development a awm dawn chuan a man pek a ngai a, a man pe tur chuan Environment-in a tawrh a ngai. ‘Forest Conservation Act’ hi a khirhkhiap lutuk a, hmasawnna hna atana hma lak a tiharsa a, heng dante hi palzuta hnualsuat lutuk si lo vin a tih dan zawn a ngai, danin a phutte a nih ang ngau ngaua hman chuan mipui tan harsatna a tam lutuk a, zawm tho si, famkim lo deuha ‘The Mizo Way’ a kal a tha mai lo’ng maw?” tiin meeting leh public platform-ah vawi duai lo a sawi a. CM duh dan hi a zahawmin a pawimawh khawp mai a, hmasawn nan Forest dan leh hrai han palzut deuh pawh a chakawm rum rum mai. Chutih rualin mihringte hi Environment leh thilsiam dangte tel lovin kan damkhawchhuak thei lo tih hi khawvel leh India hian a hrechiang tawh a, chuvangin Development aiin Environment an dah hmasa a, ‘The Mizo Way’ a kal hi a theih ngawt loh a ni.
State dang pawhin an helh ve tho:
Forest Conservation Act, 1980 leh Forest Conservation Rules, 1986 te hi a khirhin a khauh hle tak a; Reserved Forest chhunga hmasawnna Project eng pawh kalpui dawn hian harsatna sut kian tur (Forest danin a phut thil tihhlawhtlin tur) a awm nual a. Heng harsatnate hi Mizoramah chauh kan tawng lo a, State dangte pawhin an tawk ve a, an Minister-te pawhin Forest dan leh hraite hi an helh ve tho tih hi hriat tur a ni a, an helh ve tho avanga palzut theih a ni chuang lo tih pawh hriat tel tur.
Tun hnaiah Telengana State-in an Capital Hyderabad-ah IT infrastructure, crore 5000 chuang man project, IT Park & Hub vel siam an tum a; Kancha Gachibowli ramngaw thiata project lian din an tumna chu, State mipui leh zirlai ten nasa takin ramngaw leh a chhunga nungchate chhanin an dodal nghal a, High Court ah Advocate leh Environment Activists te’n petition 12 lai an thehlut a, sawrkar hmalak tan atanga ni 5-naah High Court in stay order a chhuah a, a tuk lawkah Supreme Court pawhin stay order a chhuah ve leh a, Supreme Court phei chuan insawifiah turin State sawrkar a hriattir a, an hmalakna leh insawifiahna te pawm theih a nih loh avangin State sawrkar chu an ramngaw tihchhiatte siam tha leh tura tiin a hrem ta zawk a ni.
Parivesh Portal: Central sawrkara Ministry hrang hrang tan pawh FC lak hi a buaithlak ve viau mai. FC dil tur hian ‘Parivesh Portal’ ah in register a ngai a, Project bun-na tur Forest ram chu a hmunah State Forest Officer-te leh Ministry-a Forest Officer te’n an endik a ngai a, Forest ram hman tur thlak thlengna ram neih hmasak a ngai leh a, chumi zawhah Project neitu Ministry/Department-in ramngaw siamna tur pawisa an chhun luh hnuah Ministry of EF&CC-in phalna (FC) an pe thei chauh a ni. FC dilna kalkawnga pal tlang tur tam leh hautak angreng tak hi Mizoram leh State tin tan problem a tling a; mahse hei hi mihringte damkhawchhuahna atana pawimawh – Environment, Forest leh nungchate hmakhua vang a ni tih kan hriat reng a ngai a ni.
Forest Conservation Amendment Act, 2023 siam a ni ta: Forest dan leh hrai khauh tak hi Central sawrkarah meuh pawh sawi chhuah a hlawh zing hle a. Chuvangin he dan hi palzut si lo va zawm a awlsam zawk nan, Forest (Conservation) Amendment Act, 2023 chu siam a ni a, a Act hming hi “Van (Sanrakshan Evam Samvardhan) Adhiniyam” tia thlak a ni. He danah hian project awmna chu reserved forest chhung pawh ni se, ramri hrul, ramri atanga km 100 huam chhung a nih a, project chu India ram National security atan a pawimawh tia Central sawrkarin a puan bawk chuan, FC ngai loin hma an la thei ang tih hi a awm a. Hei hi security ngaihtuah chuan thil tha tak a ni. Mahse he lai thu tak hi Asok Kumar Sharma, IFS (Rtd) chuan “India ram Forest tihchhiatna hmanrua a ni” tiin Supreme Court-ah a khing a. Supreme Court chuan “National security concern pawh ni se, Compensatory Afforestation leh Net Present Value (CA & NVP) an chawi a ngai tho ang” tiin thu a thlaksak ta a ni. Hetiang a nih chuan Defence, BRO leh Organization dang pawhin FC chu an peh hel thei dawn chuang lo leh ta rih a. Hei hian India ram Constitution humhalhtu ber Supreme Court chuan ramngaw tihchereu zel a phal lohzia a tichiang hle a ni.
Forest ram Revenue Department kuta awmte pek let leh tur: Ni 15.05.2025 khan Maharashtra State, Pune district a Kondhwa Budruk thubuaiah Supreme Court chuan Richie Rich Community Housing Society (RRCHS) ten Forest ram diklo taka Commissioner te nen an lo neih dan chhui chhuakin thutlukna a siam leh ta a. He SC thutluknaah hian Reserved Forest chhunga sawrkarin ram a lo pek ve ngawt chu State dang zawng zawngah pawh Forest Department kutah pek let leh tur a ni a ti ta bur mai a. Tun hmaa awlsam taka Forest ram chhunga ram kan lo inpe thin kha a tihchi loh hle a ni.
Forest Rights Act 2006 (FRA) tihnun a ni leh ta: Ramngaw nena inmamawha inchawm nung tawn ber mihringte chu ramngaw-a cheng leh eizawng Tribal te hi an ni a. Mizote hi Tribal kan ni a; chawhmeh, kamram thei leh ramhnuai hnephnawl dang kan zawnna ber pawh ramngaw a ni. Tuna heti taka thil a inher danglam takah hian kan tan Supreme Court hi hmelma lian pui a ni thei em? He thu kan ngaihtuah ruala kan hriat tur, Supreme Court-in a ngaih pawimawh ber leh a duhsak ber berte chu Tribal mi, Forest chhunga chengte an ni. Writ Petition (C) No. 202/95-a SC thu chhuah tam takah chuan Tribal te’n ramngaw atanga an intunnunna tura ramhnuai hnephnawl, an mamawh chuang liam ni lo, an laka an chan hi a phu-a an phu sa liau liau, tuma chhuh thiang lo an ni tiin a humhalh kawngah pawh thuneihna a pe lian hle reng a ni. Kan hriat chian tur chu Mizorama cheng Mizo Tribal tam zawk hi Forest rama chanvo hauh thei, Forest Dwellers kan ni lo chiang a, Tribal Right Act, 2006 hnuaiah hian Forest rama cheng leh intunnun nana hmangtu tan lo chuan Forest ram kan neih ve ngawt theihna dan a awm chuang lo tih hi kan hriat chian hle a ngai.
Tlangkawmna: Mizoram pawhin hma kan sawn ve zel a, tun hmaa kan hnam chin dan tha lo (Bible zirtirna nen pawha inkalh) te kha kan tih chhunzawm a rem ngawt tawh lo. A bik takin Wildlife Protection Act leh Forest Conservation Act avang te hian kan hnamin tih dan/kalphung kan lo neih thenkhatte kha chhawm nun kan tum chuan ngamloh chala chil hnawm ang chauh kan ni dawn a. State pakhat duh dan angin Supreme Court of India hi a kal ngawt dawn lo va. Supreme Court-in ngun taka ngaihtuah chunga State/hnam hrang hrangte hman tlan tur Thupek (Order) a siam milin India sawrkar leh State sawrkar te hi an kal zawk thin. Tin, Climate Change in a nghawng khawlum chak lutuk leh tui harsatna avang te, khuanu thilsiam dangte chunga ngilneih leh an hmakhaw ngaih (Bible zirtirna pawimawh tak ni bawk) avang te, Environment thianghlim tel lovin mihringte kan dam khawchhuak thei lo tih hi pawm ila. Forest dan leh hraite hi thangthar lo la awm zel turte tana kan ram (ramngaw, lui tui, nungchate leh environment) enkawl leh humhalhna dan kan neih chhunte an ni tih kan hriat fiah hunah hnawk kan ti lo vang.