Mitna hri vangin ni tin mi 80 vel inentir

Mizoramah mit na hri (conjunctivities) a leng mek
a, doctor pan pawh an pung; hriat theih chinah mitna hri vanga inentir hi ni khatah mi 80 vel zel an awm ang a ni.
Health department lamin an chhinchhiah danin, thla liam ta August-ah khan Mizoramah mit na hri (conjunctivities) vanga damdawi ina inentir hi mi 2059 an awm a, ni tin mi 80.56 zel an inentir ang a ni.
An chhinchhiah danin, Aizawl East-ah mi 1123 an awm a, ni tin mi 45 zel an inentir ang a ni. Aizawl West-ah mi 451 an awm a, ni tin mi 20.5 zel an awm ang a ni.
Lunglei-ah August thla chhungin mi 61 an inentir a, Lawngtlai-ah mi 21, Champhai-ah mi 82, Mamit-ah mi 65, Kolasib-ah mi 94, Serchhip-ah mi 143, Siaha-ah mi 19 an inentir.
Aizawl Civil Hospital-ah tun hnaiah mit na hri vanga inentir hi an thahnem a, chawlhkar liam ta Nilaini khan OPD-ah he hri veitu mi 140 an inentir. Ningani-ah mi 97 an inentir a, Zirtawpni khan mi 158 an inentir leh.
He hri veite zingah doctor pan lote pawh an awm a, mahni-a tuar dam hi mi engemaw zat an awm. August vel atanga he hri hi leng a ni a, Aizawlah chuan sikul, mitna hri an inkai chhawng ang tih an hlauh avanga chawl zuai te pawh an awm.
Aizawla sikul pakhatah chuan sikul naupang zingah mit na an awm a, an inkai chhawn zel avangin Zirtawpni vawi khat chawlh an puang a, Zirtawpni-a an chawlh chuan Inrinni leh Chawlhni-in a zui ang a, an inkai chhawn hi a dangchat thei ang tih beiseia Zirtawpni-a sikul khar an ni. An beisei angin an inkai chhawn hi a tawp phah tih an sawi.